Nuus 08:00

BULLETIN 6 Desember 8 vm

Goeiemôre. Ek is……..

In die bulletin:

# McKinsey sal Suid-Afrika meer as twee-miljard-rand betaal vir sy rol in staatskaping
# Meer as 50-duisend onwettige mynwerkers is in hegtenis geneem deur Operasie Vala Umgodi
# En die Franse president sê hy sal nie bedank nie

# Die Suid-Afrikaanse afdeling van die Amerikaanse multinasionale bestuursadvies-maatskappy, McKinsey and Company, het ingestem om Suid-Afrika sowat 2,2-miljard-rand te betaal vir sy rol in staatskaping. ‘n Amerikaanse federale hof het dit bevestig. Die Nasionale Vervolgingsgesag sê McKinsey het verantwoordelikheid erken en aanvaar vir die misdadige optrede van sy gewese vennoot, Vikas Sagar, wie se korrupte optrede aan die maatskappy kontrakte van byna twee-miljard-rand met Transnet en Eskom besorg het. McKinsey sê hy sal voortgaan om saam met Amerikaanse en Suid-Afrikaanse owerhede te werk.

# Die Wysigingswet op Gelyke Indiensneming tree op die eerste van volgende maand in werking, wat vereistes vir klein ondernemings met minder as 50 werknemers verslap. Hierdie ondernemings hoef nie meer verslae oor gelyke indiensneming in te dien nie, sodat hulle op groei en werkskepping kan fokus. Woordvoerder van die Departement van Indiensneming en Arbeid, Thobeka Magcai, sê die wysigings sal na verwagting die koste van voldoening verminder en ondernemings bemagtig om hul eie jaarlikse tekens vir Diensbillikheid te stel:

# Die nasionale polisiekommissaris, Fannie Masemola, sê meer as 50-duisend onwettige mynwerkers is in verskeie provinsies vasgetrek sedert Operasie Vala Umgodi ʼn jaar gelede ingestel is. Hy het Sabie in Mpumalanga en Stilfontein in Noordwes gister besoek om die voortgesette redding van onwettige mynwerkers wat ondergronds is, te monitor. Masemola sê sewe provinsies is uitgewys as brandpunte vir onwettige mynbedrywighede:

# Die beleërde Franse president, Emmanuel Macron, het die opposisie se druk dat hy bedank, verwerp en sê hy sal tot die einde van sy termyn in 2027 in die amp bly. Hy het die nasie gisteraand op televisie toegespreek en beloof om in die komende dae ʼn nuwe eerste minister aan te stel. Dit volg nadat Michel Barnier Woensdag ná ʼn mosie van wantroue bedank het. Macron het die pessimisme, gebrek aan aanspreeklikheid, en chaos van die linkse en verregse faksies wat die regering tot ʼn val wil bring, veroordeel.

# Sokker: Mamelodi Sundowns is in Groep F saam met Fluminense van Brasilië, die Duitse reuse Borussia Dortmund, en Ulsan van Suid-Korea vir die 2025 Fifa-klub-wêreldbeker. Die verdedigende kampioene, Manchester City, kom in Groep G teen Wydad AC van Marokko en Al Ain van die Verenigde Arabiese Emirate te staan. Lionel Messi se Inter Miami skop die toernooi af teen die Egiptiese span, Al Ahly. Die kompetisie wat vergroot is tot 32 klubs, vind in Amerika plaas en duur van 15 Junie tot 13 Julie.

# En die finansiële aanwysers: Die rand verhandel teen 18-rand-2-sent teen die dollar, 19-rand-6-sent teen die euro en 22-rand-99-sent teen die pond. Bitcoin verhandel teen 97-duisend-423-dollar-71-sent. Die prys van goud is twee-duisend-628-dollar-22-sent per fynons en die prys van Brent ruolie 72-dollar-4-sent per vat.

Bly ingeskakel vir meer nuus……………….