Nuus 07:00

BULLETIN 6 Desember 7 vm

Goeiemôre. Ek is……..

In die bulletin:

# Paul Mashatile waarsku plaaslike inwoners wat spazawinkels vir immigrante registreer
# Sowat 200 pasiënte van die Netcare Pretoria-Oos-hospitaal is veilig ná ‘n brand
# En die BOSA-leier veroordeel die politieke geweld in Mosambiek

# Adjunkpresident Paul Mashatile sê Suid-Afrikaners moet die meeste spazawinkels besit, maar waarsku hulle moenie hierdie sakeondernemings namens buitelanders registreer nie. Die regering het beveel alle spazawinkels en fasiliteite wat kos hanteer moet teen volgende Sondag geregistreer wees. Dit kom te midde van ‘n uitbreking van voedseloordraagbare siektes wat 20 kinders se lewens geëis het. Mashatile het gister vrae in die Nasionale Raad van Provinsies beantwoord en gesê die regering sal op die lang termyn wette hersien en versterk om sakebedrywighede te beheer:

# Die gewese speaker van die Nasionale Vergadering, Nosiviwe Mapisa-Nqakula, het aansoek gedoen dat die staat die hele polisiedossier bekendmaak. Sy word beskuldig dat sy 2,1-miljoen-rand aan gunslone ontvang het terwyl sy minister van Verdediging was. Sy het gister in die hof verskyn. Volgens News24 beweer die staat Afdeling A van die dossier, wat al die bewyse in die saak bevat, is reeds aan Mapisa-Nqakula bekendgemaak. Afdeling B en C van die dossier bevat die ondersoekdagboek wat nie gewoonlik aan die verdediging gegee word nie.

# Sowat 200 pasiënte moes uit die Netcare Pretoria-Oos-hospitaal verwyder word nadat ŉ brand gisteraand uitgebreek het. Een van die teaters het aan die brand geraak en noodspanne moes pasiënte en personeel na veiligheid neem. Netcare se woordvoerder, Lynne O’Connor, het aan Newzroom Afrika gesê brandbestryders het vinnig reageer en die brand onder beheer gebring. Sy sê die hospitaal is intussen veilig verklaar en die pasiënte is na die gebou teruggeneem:

# Build One South Africa se leier, Mmusi Maimane, veroordeel die toenemende politieke geweld in Mosambiek ná die onlangse verkiesing. Hy moedig president Cyril Ramaphosa aan om sy samewerking aan streeksleiers en die Suider-Afrikaanse Ontwikkelingsgemeenskap te gee om die krisis te bemiddel, vrede te bevorder en demokratiese beginsels te handhaaf. Maimane het ook ‘n beroep gedoen vir ‘n internasionale noodlenigingsfonds om slagoffers by te staan en beklemtoon die behoefte aan ‘n geloofwaardige, vry en regverdige verkiesing in Mosambiek indien ‘n herverkiesing nodig is.

# Gholf: Die verdedigende kampioen, Max Homa van Amerika, is een hou voor die Suid-Afrikaner, Ockie Strydom, na ŉ aanvangsronde van ses onder 66 by die Nedbank Golf Challenge in Sun City. Die Engelse paar, Andy Sullivan en Matthew Jordan, is drie houe agter en deel die derde plek met Pablo Larrazabal van Spanje en die Nederlander, Thorbjorn Olesen. Die Suid-Afrikaner Christiaan Bezuidenhout is in die volgende groep. Homa sê hy het oor die algemeen goed gespeel:

# Die finansiële aanwysers: Die rand verhandel teen 18-rand-5-sent teen die dollar, 19-rand-8-sent teen die euro en 23-rand-1-sent teen die pond. Bitcoin verhandel teen 97-duisend-845-dollar-71-sent. Die prys van goud is twee-duisend-619-dollar-7-sent per fynons en die prys van Brent ruolie 71-dollar-80-sent per vat.

# En ten slotte: Die Stad Ekurhuleni versoek inwoners om veiligheidsmaatreëls te tref aangesien die huidige hittegolf tot Sondag gaan duur. Hoë temperature word in die vooruitsig gestel en die stad waarsku teen die gevare van ontwatering, krampe, hitte-uitputting en sonsteek. Inwoners word aangeraai om nie oop vlamme sonder toesig te laat nie en om gehidreer te bly met water of sportdrankies. Die stad waarsku ook teen swem in verbode gebiede en herinner ouers om noukeurig toesig te hou oor kinders naby water.

Bly ingeskakel vir meer nuus……………….