Nuus 06:00

BULLETIN 6 Desember 6 vm

Goeiemôre. Ek is……..

In die bulletin:

# Die Kabinet loof positiewe ekonomiese ontwikkelings
# Die DA dring aan op ‘n vinnige oplossing vir die Suid-Afrikaanse Lugdiens-staking
# En krieket: Ryan Rickelton plaas die Proteas in ‘n stewige posisie in die tweede toets teen Sri Lanka

# Die Kabinet het verskeie positiewe ekonomiese ontwikkelings geprys, insluitend die 294-duisend werksgeleenthede wat geskep is in die derde kwartaal wat die werkloosheidskoers verlaag het tot 32,1-persent. Die Kabinet verwelkom die positiewe vooruitsigte van die Internasionale Monetêre Fonds en die kredietgraderingsagentskap S&P ten spyte van die effense daling van 0.3-persent in die bruto binnelandse produk. Die minister in die Presidensie, Khumbudzo Ntshavheni, prys ook Saoedi-Arabië se belegging van 9,5-miljard-rand vir die smelt van platinum, en die Suid-Afrikaanse Lugdiens se terugkeer tot winsgewendheid:

# Die Suid-Afrikaanse Kamer van Handel en Nywerheid wys op die behoefte aan diepgaande oplossings na die bekendmaking van die jongste syfers van die bruto binnelandse produk wat dalende ekonomiese prestasie aantoon. Hoewel hy vordering deur inisiatiewe soos Operasie Vulindlela erken, sê uitvoerende hoof, Alan Mukoki, hierdie stappe is onvoldoende ten opsigte van werkloosheid, ongelykheid en armoede. Hy vra vir ‘n holistiese hersiening en beklemtoon samewerking is noodsaaklik vir volhoubare ekonomiese herstel:

# Die DA sê die voortgesette staking van vlieëniers by die Suid-Afrikaanse Lugdiens moet dringend opgelos word om skade aan die toerismeseisoen te voorkom. Die party waarsku ontwrigtings tydens die spitstyd kan lei tot miljoene rande se verlore inkomste, omdat talle passasiers gewoonlik in Desember met die redery vlieg. Haseena Ismail van die DA versoek die SAL om so spoedig moontlik ‘n oplossing vir die staking te vind om die ekonomie en die toerismesektor te beskerm:

# Die speaker van Johannesburg se raad, Nobuhle Mthembu, is bekommerd oor die uitwerking van die Gautengse Hooggeregshofbeslissing dat stadsbestuurder Floyd Brink se aanstelling onwettig is. Die stad ondervind ‘n erge waterkrisis en wydverspreide ontevredenheid onder inwoners oor dienslewering. Mthembu het die dringende behoefte aan bestendige leierskap beklemtoon. Sy vra ‘n spoedige oplossing om verdere ontwrigting te verhoed en te verseker die stad se leierskap gee aandag aan die gemeenskap se dringende behoeftes.

# Die polisie in New York sê drie koeëldoppies wat op die toneel van die sluipmoord op die Amerikaanse versekeringsmaatskappy UnitedHealthcare se uitvoerende hoof, Brian Thompson, gevind is, het die woorde deny, defend, en depose bevat. Die 50-jarige is Woensdag in Manhattan doodgeskiet in wat die polisie ‘n geteikende aanval genoem het. Volgens berigte ondersoek die polisie of die woorde op die koeëldoppies verband hou met ‘n motief, want dit is ‘n gewilde frase in die versekeringsbedryf. Die verdagte is steeds op vrye voet.

# Krieket: Ryan Rickelton het ‘n briljante kolfvertoning gelewer met Suid-Afrika op 269 vir sewe teen die einde van dag een van die tweede toets teen Sri Lanka in Gqeberha. Rickelton, wat instaan vir die beseerde Wiaan Mulder, het 101 van 250 balle aangeteken. Dit was sy eerste honderdtal. Hy het twee belangrike vennootskappe gehad, 133 met kaptein Temba Bavuma en 77 met Kyle Verreynne. Lahiru Kumara het drie paaltjies vir Sri Lanka ingepalm. Die Proteas het verlede week se eerste toets in Durban met 233 lopies gewen.

# En die finansiële aanwysers: Die rand verhandel teen 18-rand-2-sent teen die dollar, 19-rand-7-sent teen die euro en 22-rand-99-sent teen die pond. Bitcoin verhandel teen 96-duisend-908-dollar-49-sent. Die prys van goud is twee-duisend-633-dollar-7-sent per fynons en die prys van Brent ruolie 72-dollar-14-sent per vat.

Bly ingeskakel vir meer nuus……………….