Nuus 17:00

BULLETIN NUUSAGENTSKAP 5 Desember 5 nm

Goeiemiddag. Ek is……..

In die bulletin:

# Die kabinet prys die Energie-aksieplan vir die verbetering in kragvoorsiening 
# ‘n Boer van Fochville word in hegtenis geneem vir onwettige elektrisiteitsverspreiding aan meer as 600 huishoudings
# En, perdry: ‘n Britse Olimpiese kampioen word vir ‘n jaar geskors nadat sy ‘n perd slaan

# Die kabinet is trots op die suksesvolle instelling van die Nasionale Energie-aksieplan, onder leiding van die minister van Elektrisiteit en Energie, Kgosientsho Ramokgopa. Die plan het gesorg vir 252 dae van ononderbroke kragvoorsiening, en ‘n besparing van 17,37-miljard-rand. Die minister in die Presidensie, Khumbudzo Ntshavheni, het op ‘n nuuskonverensie gesê die kabinet is ook op datum gebring rakende Eskom se vordering met die suksesvolle omskakeling van 5,5-miljoen “nulkoop”-kragmeters:

‘n Boer van Fochville in Gauteng sal intussen Woensdag in die hof verskyn in verband met die beweerde onwettige verspreiding van elektrisiteit aan meer as 600 informele huishoudings, wat Eskom ‘n geraamde 6,6-miljoen-rand gekos het. Hy is aangekeer tydens ‘n gesamentlike klopjag deur Eskom, die polisie en City Power wat gesteelde toerusting gevind het wat gebruik word om krag te voorsien in ruil vir betaling. Die boer het die kragtoevoer verskeie kere weer aangesluit nadat dit ontkoppel is. Hy word aangekla van onder meer gepeuter aan infrastruktuur, en bly in aanhouding.

# Frankryk en Nederland se nasionale lugrederye, Air France en KLM, het ‘n ooreenkoms met die Suid-Afrikaanse streeks-redery, Airlink, gesluit. Volgens die ooreenkoms het dié twee groot Europese lugrederye nou toegang tot 14 plaaslike Airlink-roetes in Suid-Afrika. Lede van Air France en KLM se Flying Blue-getrouheidsprogram sal ook myle verdien op sekere Airlink-vlugte. Air France-KLM en Airlink beplan om hul samewerking uit te brei na Afrikalande soos Angola, Botswana, Zimbabwe en Malawi.

# Die eThekwini Munisipaliteit sê Durban rol hierdie feestyd die rooi tapyt uit vir reisigers aangesien dapper stappe gedoen is om toerisme te laat herleef en ‘n veiliger en betowerende ervaring vir almal te verseker. Winile Mntungwa van Durban Toerisme sê die stad het onverpoosd gewerk om vorige uitdagings aan te pak en besienswaardighede op te knap. Sy sê verbeterings sluit in bestendige strandwatergehalte, swembaddens wat ten volle in bedryf is, ‘n kragtige veiligheidstrategie en opgegradeerde instandhoudingstandaarde:

# Perdry: Die Britse driemalige Olimpiese gouemedaljewenner in dressuur, Charlotte Dujardin, is vir ‘n jaar uit die sport geskors na ‘n video wat wys hoe sy ‘n perd tydens ʼn oefening slaan. Sy is gedwing om aan vanjaar se Spele in Parys te onttrek nadat sy kort voor die tyd voorlopig geskors is. Die Internasionale Federasie vir Perdesport het Dujardin ook met meer as 200-duisend-rand beboet. Die 39-jarige het erken dit was ‘n oordeelsfout. Die skorsing is terugwerkend tot Julie.

# En die finansiële aanwysers: Die rand verhandel teen 18-rand-6-sent teen die dollar, 19-rand-4-sent teen die euro en 22-rand-99-sent teen die pond. Bitcoin verhandel teen 103-duisend-225-dollar. Die prys van goud is twee-duisend-651-dollar-83-sent per fynons en die prys van Brent-ruolie 72-dollar-14-sent per vat.

Bly ingeskakel vir meer nuus……………….