Nuus 11:00

BULLETIN 5 Desember 11 vm

Goeiemôre. Ek is……..

In die bulletin:

#  President Ramaphosa keur die Nasionale Padverkeerswysigingswetsontwerp goed
# Flight Centre monitor die staking van die Suid-Afrikaanse Lugdiens se vlieëniers
# En Amnestie Internasionaal sê Israel se optrede in Gaza kom neer op volksmoord

# President Cyril Ramaphosa het die Wysigingswetsontwerp op Nasionale Padverkeer bekragtig wat na verwagting padveiligheid sal verbeter. Dit sluit in bestuurders en voertuie se geskiktheid, die vervoer van sekere gevaarlike goedere, algemene spoedbeperkings en die geldige uitreiking van voertuiglisensies en rybewyse. Ramaphosa sê die wetsontwerp wysig die Nasionale Padverkeerswet en sluit bedrog in as oortreding vir enigeen wat ‘n rybewys-aansoeker help oortree. Tien-duisend-154 mense het reeds vanjaar op die land se paaie gesterf.

# Flight Centre South Africa monitor die staking van die Suid-Afrikaanse Lugdiens se Vlieëniersvereniging. Die vereniging het in Mei aanvanklik ‘n verhoging van 30-persent in vlieëniers se salarisse geëis, wat daarna verlaag is tot 15,7-persent plus verwante voordele. SAL het ‘n salarisverhoging van 8,46-persent aangebied. Flight Centre se besturende direkteur, Euan McNeil, sê hoewel die duur van die staking nie duidelik is nie, is daar aansienlike kommer oor die moontlike ontwrigtings tydens die Desember-reisseisoen.

# Die onderwysaktivis Hendrick Makaneta versoek die Suid-Afrikaanse Raad vir Opvoeders om alle onderrigsertifikate te kanselleer en met ‘n landwye proses van herregistrasie vir opvoeders te begin. Dit volg op onthullings dat 16-duisend onderwysers na bewering misdaadrekords het, wat kommer laat ontstaan oor leerders se veiligheid. Makaneta glo herregistrasie met agtergrond-ondersoeke sal die publiek se vertroue herstel en verseker slegs gekwalifiseerde, etiese onderwysers bly in die beroep:

# Amnestie Internasionaal se nuwe verslag voer aan Israelse owerhede het volksmoord teen Palestyne in Gaza gepleeg en doen dit steeds. Israel se regering ontken die bewering ten sterkste. Die verslag bevat inligting wat oor nege maande versamel is en noem drie uit vyf optredes wat ingevolge die Verenigde Nasies se Volksmoordkonvensie verbied word. Amnestie se sekretaris-generaal, Agnès Callamard, sê dit sluit massa-sterftes onder Palestynse burgerlikes en ernstige liggaamlike of geestelike skade in:

# Krieket: Engeland se kaptein, Ben Stokes, het sarkasties reageer nadat die Internasionale Krieketraad sy span en Nieu-Seeland elk drie strafpunte in die Wêreldtoetskampioenskap opgelê het vir ‘n stadige boultempo in die eerste toets in Christchurch. Al die spelers is ook 15-persent van hulle wedstrydfooi beboet. Nieu-Seeland en Engeland is nou vyfde en sesde op die kampioenskapspunteleer na Indië, Suid-Afrika, Australië en Sri Lanka. Stokes het op sosiale media daarop gewys dat hulle die Swartpette geklop het met 10-uur se spel oor.

Bly ingeskakel vir meer nuus……………….

# En die finansiële aanwysers: Die rand verhandel teen 18-rand-13-sent teen die dollar, 19-rand-9-sent teen die euro en 23-rand-6-sent teen die pond. Bitcoin verhandel teen 101-duisend-956-dollar. Die prys van goud is twee-duisend-647-dollar-49-sent per fynons en die prys van Brent-ruolie 72-dollar-28-sent per vat.