Nuus 07:00

BULLETIN 5 Desember 7 vm

Goeiemôre. Ek is……..

In die bulletin:

# Eskom het meer as 16-miljard-rand aan dieselkoste bespaar
# President Ramaphosa is op ‘n staatsbesoek aan Algerië
# En krieket: Die Protea-vroue troef Engeland in hul eerste eendagwedstryd

# Die Eskom-hoof Dan Marokane sê ‘n data-gedrewe benadering en beter bestuurspraktyke is die rede vir die kragverskaffer se finansiële en bedryfsverbetering. Hy het die parlementêre portefeuljekomitee vir Elektrisiteit en Energie gister toegespreek. Marokane sê daar was die afgelope agt maande geen beurtkrag nie wat tot ʼn massiewe daling in dieselgebruik gelei en Eskom 16,3-miljard-rand gespaar het. Hy sê die verlenging van steenkoolkragstasies se leeftyd is een van die redes vir die verbetering in opwekking en beurtkrag:

Marokane sê ook die grootste risiko tans is die wanbetaling van staatsinstellings soos munisipaliteite se elektrisiteitsrekeninge. Munisipaliteite skuld die kragverskaffer tans sowat 90-miljard-rand. Eskom het die tien topmunisipaliteite geïdentifiseer wat die meeste skuld en sy finansiële volhoubaarheid ernstig bedreig. Marokane sê die hantering van munisipale skuld is noodsaaklik om die verspreidingsonderneming se lewensvatbaarheid te verseker:  

# Exxaro Resources het sy uitvoerende hoof, Nombasa Tsengwa, voorlopig geskors as voorsorgmaatreël hangende ‘n onafhanklike ondersoek na bewerings van wangedrag. Die ondersoek volg ná bewerings van ‘n streng bestuurstyl en kwessies by die werkplek, insluitend verskeie uitvoerende bedankings. Tsengwa, Exxaro se eerste vroulike uitvoerende hoof, word verder beskuldig van die versuim om korrupsie binne die onderneming aan te spreek. Exxaro-aandele het vanjaar met 16-persent gedaal. Die onderneming het Riaan Koppeschaar as waarnemende uitvoerende hoof aangestel om bestendigheid te verseker gedurende die ondersoektydperk.

# Johannesburg Water gaan vandag voort met ʼn beplande onderneming om onwettige waterverbindings in Emndeni, Soweto, af te sny. Dis deel van die waterverskaffer se voortgesette pogings om probleme met ongemagtigde verbindings aan te spreek wat die integriteit van die metro se waternetwerk ondermyn en bydra tot die vermorsing van water. Johannesburg Water sê die Metropolisie-departement en polisie-eenheid vir openbare orde sal op bystand wees omdat die operasie moontlik kan lei tot weerstand en oproerigheid uit die gemeenskap.

# President Cyril Ramaphosa is van vandag tot Saterdag op ʼn tweedaagse staatsbesoek aan Algerië. Woordvoerder Vincent Magwenya sê die twee leiers sal die gesamentlike voorsitters wees van die 7de Suid-Afrika-Algerië Bi-nasionale Kommissie ter bevordering van politieke, ekonomiese en maatskaplike betrekkinge. Volgens Magwenya sal die samesprekings handel oor streeks- en globale kwessies, die verbetering van handel in Afrika en die vordering sedert die samesprekings van die Bi-nasionale Kommissie in 2015 in oënskou neem. Daarbenewens sal ʼn sakeforum handel, belegging en die uitruil van tegnologie tussen Suid-Afrikaans en Algerynse entrepreneurs bevorder.

# Krieket: Die Protea-vroue het ʼn skitterende vertoning gelewer en Engeland in die eerste eendagwedstryd in Kimberley met ses paaltjies verslaan. Die besoekers was op 186 almal uit met Marizanne Kapp en Annerie Dercksen wat elkeen drie paaltjies platgetrek het. In antwoord het kaptein Laura Wolvaardt ʼn onoorwonne 59 en haar 33ste eendagwedstryd-vyftigtal aangeteken, Nadine de Klerk het ʼn onoorwonne 48 en Suid-Afrika haal die teiken met 70 balle wat oorbly. Die tweede van drie eendagwedstryde vind Sondag in Durban plaas.

# En die finansiële aanwysers: Die rand verhandel teen 18-rand-17-sent teen die dollar, 19-rand-10-sent teen die euro en 23-rand-7-sent teen die pond. Bitcoin verhandel teen 98-duisend-299-dollar-71-sent. Die prys van goud is twee-duisend-646-dollar-97-sent per fynons en die prys van Brent ruolie 72-dollar-40-sent per vat.

Bly ingeskakel vir meer nuus……………….