Nuus 11:00

BULLETIN 3 Desember 11 vm

Goeiemôre. Ek is……..

In die bulletin:

# ‘n Kenner sê BRICS-lande sal ly onder ‘n 100-persent tarief van Trump
# Julius Malema sê niemand wat die EFF verlaat het, was polities suksesvol nie
# En die Universiteit Stellenbosch se topbestuur oorleef die bewerings oor die Wilgenhof-verslag

# BRICS-lande se ekonomieë gaan skade ly as Amerika se verkose president, Donald Trump, ‘n tarief van 100-persent teen die lande instel. Dis die mening van Future Forex se uitvoerende hoof, Harry Scherzer. Trump dreig om die tarief teen BRICS-lande in te stel indien hulle ʼn ander geldeenheid as teenvoeter vir die Amerikaanse dollar gebruik. Scherzer sê indien Trump wel die tariewe instel, sal dit veral Suid-Afrika kniehalter weens sy sterk handelsverhoudinge met Amerika:

# Die EFF-leier, Julius Malema, sê die wete dat nie ‘n enkele persoon wat die party die afgelope elf jaar verlaat het daarna in die politiek geslaag het nie, laat hom lekker slaap. Die EFF het die afgelope paar maande ‘n massa-uittog van hoëprofiellede ondervind toe onder andere Floyd Shivambu, Dali Mpofu, Mzwanele Manyi en Busisiwe Mkhwebane die party verlaat het. Malema het op die Hustlers Corner-potsending gesê hy is nie geskok oor al die mense wat besluit het om die party te verlaat nie:

# Die DA versoek die minister van Elektrisiteit, Kgosientsho Ramokgopa, om voorrang te gee aan privaat sektor-gedrewe energie-opwekking eerder as besteding van 90-miljard-rand aan die uitbreiding van steenkoolaanlegte. DA-woordvoerder Kevin Mileham wys op planne met hernubare energie en battery-opberging as bekostigbare alternatiewe om die netwerk bestendig te maak. Hy waarsku oor die finansiële en omgewingsgevolge indien die leeftyd van steenkoolaanlegte verleng word. Mileham vra volhoubare energie-oplossings om Suid-Afrika se energietoekoms te beveilig:

# Die Universiteitsraad van Stellenbosch het ‘n mosie deur ‘n meerderheidstem asook die verduideliking van sy voorsitter en vise-kanselier aanvaar oor die verslag rakende die sluiting van die omstrede Wilgenhof-koshuis. Die vise-kanselier, Wim de Villiers, en die raadsvoorsitter, Nicky Newton-King, is beskuldig dat hulle die finale verslag aangepas het. Die raad het ook sy vroeëre besluit herbevestig dat die koshuis gesluit moet word en as nuut voorgestelde manskoshuis moet heropen.

# Motorsport: Die Mexikaan Sergio Perez gaan volgens berigte sy bestuurdersposisie by Red Bull verloor ná die komende naweek se laaste Grand Prix van die seisoen in Abu Dhabi. Die 34-jarige het slegs 152 van Red Bull se 581 vervaardigerspunte aangeteken en is 227 punte agter die wêreldkampioen, Max Verstappen. Die kontrakverlenging wat Perez in Junie onderteken het, beteken dat hy nie summier afgedank kan word nie, maar hy kan na ‘n ambassadeursposisie verskuif word. Die Red Bull-renjaers Yuki Tsunoda en Liam Lawson is die voorste kandidate om hom te vervang.

# En die finansiële aanwysers: Die rand verhandel teen 18-rand-13-sent teen die dollar, 19-rand-2-sent teen die euro en 22-rand-94-sent teen die pond. Bitcoin verhandel teen 95-duisend-657-dollar-19-sent. Die prys van goud is twee-duisend-646-dollar-49-sent per fynons en die prys van Brent-ruolie 72-dollar-3-sent per vat.

Bly ingeskakel vir meer nuus……………….