Nuus 17:00

BULLETIN NUUSAGENTSKAP 2 Desember 5 nm

Goeiemiddag. Ek is……..

In die bulletin:

# Tshwane se burgemeester kondig n geskiedkundige ooreenkoms aan om Eskom se skuld van 6,67-miljard-rand te vereffen
# SANParks stel hek-kwotas in vir dagbesoekers aan die Kruger-widtuin
# En, tennis: Juan Martin del Potro sluit sy beroepsloopbaan af met ‘n vertoonwedstryd teen Novak Djokovic

# Die Stad Tshwane het ‘n mylpaal-ooreenkoms met Eskom bereik om sy skuld van 6,67-miljard-rand te vereffen. Die burgemeester, Nasiphi Moya, het ‘n vyf-jaar-terugbetalingsplan aangekondig, wat hierdie maand met 400-miljoen-rand begin. Die stad het hom ook daartoe verbind om sy huidige rekenings betyds te betaal om verdere skuld te voorkom. Moya het op ‘n nuuskonferensie die minister van Elektrisiteit en Energie, Kgosientsho Ramokgopa, bedank vir sy hulp met die onderhandelings:

# Die Outomobiel-Assosiasie waarsku motoriste om Woensdag verskillende brandstofprysveranderings te verwag. Die prys van 93-oktaan petrol kan met sewe-sent daal, maar 95-oktaan sal waarskynlik met drie-sent per liter styg. Die pryse van diesel en lampolie sal na verwagting ook styg. Die AA se woordvoerder, Eleanor Mavimbela, sê hierdie veranderings, sowel as aanpassings aan bedryfsmarges, kan veroorsaak dat brandstofpryse verder styg:

# SANParke het hek-kwotas ingestel vir dagbesoekers aan die Nasionale Kruger-wildtuin gedurende die feestyd. Besoekers word aangeraai om vooraf aanlyn te bespreek of via SANParke-besprekings. Tydgleuwe sluit in half-ses tot agtuur soggens, van agt tot tien voormiddag, en na 10-uur. SANParke sê vooraf besprekingsfooie word gehef en bewaringsfooie is verpligtend. Voertuie sonder nommerplate word nie toegelaat nie en besoekers word gemaan om die parkreëls te gehoorsaam vir ‘n veilige en genotvolle ervaring.

# Tennis: Die 36-jarige Argentyn, Juan Martin del Potro, het uitgetree nadat sy belowende beroepsloopbaan deur verskeie beserings in die wiele gery is. Hy het die Amerikaanse Ope in 2009 gewen en in 2018 tot derde op die wêreldranglys gevorder, maar die volgende jaar sy knieskyf gekraak. Del Potro het in 2022 in sy laaste toernooi gespeel. Die plaaslike held het sy loopbaan in ʼn vertoonwedstryd in Argentinië afgesluit met ʼn oorwinning van 6-4, 7-5 oor Novak Djokovic van Serwië. Hy het agterna sy bekende bandana oor die net gehang.

# Die finansiële aanwysers: Die rand verhandel teen 18-rand-17-sent teen die dollar, 19-rand-10-sent teen die euro en 23-rand-3-sent teen die pond. Bitcoin verhandel teen 95-duisend-699-dollar. Die prys van goud is twee-duisend-642-dollar-34-sent per fynons en die prys van Brent-ruolie 72-dollar-54-sent per vat.

# En ten slotte: Die Lughawensmaatskappy van Suid-Afrika skakel vandag sy Kersliggies vir 2024 aan wat ‘n feestelike atmosfeer op al nege sy lughawens skep. Vanjaar se tema, Kersfees onder die Son, weerspieël Suid-Afrika se kleurvolle kultuur en landskap. Die geleentheid is ook die amptelike aanskakelseremonie op OR Tambo Internasionaal en wil die lughawe-ervaring met feestelike bedrywighede verbeter, wat sowel die vakansiegees as ACSA se kleinhandelvennote ’n hupstoot gee.

Bly ingeskakel vir meer nuus……………….