Sportnuus 12:30

BULLETIN SPORTNUUS 2 Desember 12.30 nm

Goeiemiddag. Ons kyk na die jongste sportnuus en uitslae:

# Eerste aan die beurt is krieket: Die Protea-snelbouler, Gerald Coetzee, gaan die tweede toets teen Sri Lanka, en die komende toer van alle formate teen Pakistan misloop weens ‘n liesbesering. Die 24-jarige speler het Saterdag tydens die eerste toets in Durban ongemak ervaar. ŉ Skandering het getoon ŉ spier in sy regterlies is verrek. Hy sal vier tot ses weke buite aksie wees. Die jong Lions-speler, Kwena Maphaka, vervang Coetzee in die tweede toets wat Donderdag op St Georgepark in Gqeberha begin.

# Vervolgens, rugby: Die Blitsbokke het ‘n teleurstellende sesde plek behaal op die Dubaise Sewes. Hulle het 17-15 teen Frankryk verloor in die uitspeelwedstryd om vyfde plek nadat hulle in die kwarteindronde 24-17 teen Nieu-Seeland verloor het. Fidji het Spanje in die eindstryd 17-5 verslaan om ‘n vroeë voorsprong in die 2024/’25-seisoen te neem. Dit is die eerste keer in ses jaar dat ‘n ander span as die Blitsbokke in Dubai wen. Afrigter Philip Snyman sê hul algehele vertoning was teleurstellend:

# Ons kom by atletiek: Die Olimpiese kampioene Letsile Tebogo van Botswana en Sifan Hassan van Nederland is op die Wêreldatletiektoekennings in Monaco aangewys as die mans- en die vroue-atleet van die jaar. Die 21-jarige Tebogo het in Parys Botswana se eerste Olimpiese kampioen geword toe hy die 200-meter gewen het. Hy het ook die toekenning vir mans-baanatleet van die jaar ingepalm. Mondo Duplantis van Swede, wat sy eie wêreldrekord verbeter het met sy gouemedalje in die paalspring, is aangewys as mans-veldatleet van die jaar.

# Vervolgens, sokker: Liverpool het hulle voorsprong boaan die Premierliga-punteleer vergroot deur die huidige kampioen, Manchester City, 2-0 te klop op Anfield. Cody Gakpo en Mo Salah se doele het die oorwinning vir die Reds verseker, en hulle op elf punte voor City in die vyfde plek geplaas. City het nou die eerste keer sedert Augustus 2008 hulle laaste vier Premierligawedstryde verloor. Die span se hoofafrigter, Pep Guardiola, wat verlede maand ‘n nuwe kontrak van twee jaar geteken het, sê hy het steeds vertroue in sy spelers:

# Ons loer laastens in by motorsport: Die sewemalige Formule Een-wêreldkampioen, Lewis Hamilton, sê die teleurstellende wyse waarop hy sy loopbaan by Mercedes beëindig, som nie hulle verhouding van 12-jaar op nie. Die Britse jaer het hom die naweek twee strafpunte op die hals gehaal en 12de geëindig in die Katarse Grand Prix. Hy sluit volgende seisoen by Ferrari aan. Hamilton sê hy sal alles uithaal in die naweek se laaste wedren in Abu Dhabi:

Bly ingeskakel vir meer nuus……………….