Nuus 12:00

BULLETIN NUUSAGENTSKAP 2 Desember 12 nm

Goeiemiddag. Ek is……..

In die bulletin:

# President Ramaphosa reageer op Trump se dreigement teen BRICS-lande
# ‘n Onderwyskenner vra breër besprekings oor die BELA-wet
# En, motorsport: Lewis Hamilton beloof om alles uit te haal in sy laaste wedren vir Mercedes

# President Cyril Ramaphosa sê Suid-Afrika sal die tussenganger wees in diplomatieke samesprekings met die verkose Amerikaanse president, Donald Trump, eerder as om betrokke te raak by botsings op sosiale media oor bilaterale kwessies. Dit volg nadat Trump gedreig het om 100-persent tariewe in te stel vir BRICS-lande as hulle ‘n mededingende wisselkoers vir die Amerikaanse dollar sou skep. Ramaphosa sê Suid-Afrika sal nou saamwerk met Amerika deur die presidentskap van die G20.

# Die onderwyskundige Mary Metcalfe moedig die regering aan om breër gesprekke te voer oor die BELA-wet. Dit volg op die teenreaksie van pro-BELA-groepe wat die ooreenkoms verwerp tussen Solidariteit en die minister van Basiese Onderwys, Siviwe Gwarube, oor Klousule 4 en 5 van die wet. Metcalfe beklemtoon die behoefte aan inklusiewe besprekings om seker te maak die wet bevoordeel alle rolspelers en bevorder billike oplossings:

Die onderwysersvakbond Sadou se sekretaris-generaal, Mugwena Maluleke, het intussen planne aangekondig vir versetoptrede om die instelling van die artikels te eis. Maluleke veroordeel teenkanting daarteen en beskryf dit as verset teen verandering. Hy kritiseer die ooreenkoms tussen Solidariteit en Gwarube en beweer dit bevorder rassisme en etniese verdelings. Maluleke vra maatskaplike samewerking:

# Die Stad Kaapstad sê hy sal operasies voortsit om seker te maak spazawinkels voldoen aan wette wat die gesondheid en veiligheid van die publiek beskerm. Die metro het verlede week meer as een-duisend spazawinkels geregistreer. President Ramaphosa het die registrasieproses gelas na die dood van meer as 20 kinders weens besmette kos, en die spertyd is 13 Desember. Die burgemeesterskomiteelid vir Gemeenskapsveiligheid en Gesondheid, Patricia van der Ross, sê net meer as twee-duisend spazawinkels moet nog geregistreer word.

# Motorsport: Die sewemalige Formule Een-wêreldkampioen, Lewis Hamilton, sê die teleurstellende wyse waarop hy sy loopbaan by Mercedes beëindig, som nie hulle verhouding van 12-jaar op nie. Die Britse jaer het hom die naweek twee strafpunte op die hals gehaal en 12de geëindig in die Katarse Grand Prix. Hy sluit volgende seisoen by Ferrari aan. Hamilton sê hy sal alles uithaal in die naweek se laaste wedren in Abu Dhabi:

# En die finansiële aanwysers: Die rand verhandel teen 18-rand-12-sent teen die dollar, 19-rand-5-sent teen die euro en 22-rand-99-sent teen die pond. Bitcoin verhandel teen 95-duisend-991-dollar. Die prys van goud is twee-duisend-630-dollar-71-sent per fynons en die prys van Brent-ruolie 72-dollar-30-sent per vat.

Bly ingeskakel vir meer nuus……………….