Nuus 08:00
BULLETIN 2 Desember 8 vm
Goeiemôre. Ek is……..
In die bulletin:
# Padongelukke kos die ekonomie 205-miljard-rand per jaar
# Die Ouditeur-generaal sê staatsamptenare trek steeds voordeel uit staatskontrakte
# President Biden skeld sy seun Hunter kwyt
# Die minister van Vervoer of Barbara Creecy sê padongelukke het die ekonomie verlede jaar 205-miljard-rand gekos, oftewel 2,74-persent van die bruto binnelandse produk. Sy het die departement se feestydpadveiligheidsveldtog gister in Pretoria afgeskop. Tot dusver vanjaar is tien-duisend-154 mense op die land se paaie dood. Creecy sê die veldtog rus op vier pilare, wat insluit verantwoordelike bestuur, voetgangerveiligheid, afdwinging en opleiding, sowel as vennootskappe en samewerking:
# Die ouditeur-generaal Tsakani Maluleke sê regeringsamptenare en hulle families baat steeds by staatskontrakte. Sy het onthul die regering het tussen April 2023 en Maart 2024 173 tenders ter waarde van 121-miljoen-rand toegestaan aan maatskappye wat besit of bestuur word deur families van staatsamptenare. Boonop is 84 tenders van 32-miljoen-rand toegeken aan verskaffers wat deur staatsamptenare besit of bestuur word. Maluleke sê regeringsdepartemente kom nie verkrygingswetgewing na nie wat daartoe lei dat kontrakte onwettig toegestaan word.
# Die Hooggeregshof in Pretoria het aan Lawyers for Human Rights ‘n tussentydse bevel toegestaan wat gemeenskapslede en liefdadigheidsorganisasies toelaat om kos en hulp te verleen aan onwettige mynwerkers wat steeds ondergronds is in Stilfontein, Noordwes. Dis onduidelik hoeveel nog ondergronds is. Lawyers for Human Rights sê die hof het beveel hulp moet onmiddellik verleen word en mynwerkers se behoefte aan humanitêre bystand moet hanteer word. Hy sê die tussentydse bevel beklemtoon die mynwerkers se reg op lewe.
# Die Amerikaanse president Joe Biden het ‘n volle en onvoorwaardelike kwytskelding uitgereik vir sy seun Hunter, wat dié maand gevonnis sou word in twee strafregtelike sake. Hy is in Junie skuldig bevind as ‘n gebruiker van onwettige dwelms wat ‘n vuurwapen besit het, en het in September skuldig gepleit op belastingaanklagte. Hunter Biden het die eerste kind van ‘n sittende president geword wat skuldig bevind is aan ‘n misdaad. Biden sê sy seun is selektief, en onregverdig, vervolg, en noem die sake regsdwalings.
# Motorsport: Red Bull-renjaer Max Verstappen het ʼn dramatiese Katar Grand Prix gewen toe hy Charles Leclerc van Ferrari en McLaren-bestuurder Oscar Piastri geklop het. Die Brit, Lando Norris van McLaren het derde weggespring maar ʼn stop-en-ry-strafpunt gekry wat hom laaste geplaas het. Hy het herstel en tiende geëindig. Lewis Hamilton van Mercedes het ná twee boetes twaalfde klaargemaak. McLaren het ʼn voorsprong van 21 punte bo Ferrari in die Vervaardigerskampioenskap met die seisoen se laaste Grand Prix in Abu Dhabi wat voorlê. Verstappen sê dit was ʼn goeie wedren:
# En die finansiële aanwysers: Die rand verhandel teen 18-rand-15-sent teen die dollar, 19-rand-10-sent teen die euro en 23-rand-3-sent teen die pond. Bitcoin verhandel teen 97-duisend-496-dollars-23-sent. Die prys van goud is twee-duisend-624-dollar-20-sent per fynons en die prys van Brent ruolie is 72-dollar-30-sent per vat.
Bly ingeskakel vir meer nuus……………….