Oggendkoerant-verslag
Die hooftrekke uit die belangrikste nuusblaaie soos op 02 Desember 2024:
NASIONAAL:
# Business Day:
Berig Suid-Afrika se presidentskap van die G20 begin op ‘n moeilike noot met Amerika se verkose president Donald Trump wat dreig indien Brics-lande die dollar as globale reserwegeldeenheid wil vervang, hulle swaar getstraf sal word.
GAUTENG:
# Beeld:
Berig die ooreenkoms wat die vakbond Solidariteit oor die omstrede Bela-wet onderteken het, het na bewering sonder president Cyril Ramaphosa se medewete plaasgevind. Die Presidensie was egter een van die ondertekenaars en die uitvoerende hoof van Solidariteit, Dirk Hermann, sê hulle beskou die ooreenkoms as bindend.
Dan skryf die koerant die 19-jarige Suid-Afrikaner, Hané van der Merwe wat in Portugal in ‘n ernstige ongeluk betrokke was, herstel goed.
En laastens is daar ook ‘n berig oor Trump se dreigemente teen Brics.
# The Star & Pretoria News:
Berig adjunkpresident Paul Mashatile het ‘n ooreenkoms onderteken om die verkryging van antiretrovirale middels te vergemaklik.
En berig ook oor die woordestryd oor die Bela-wet.
# Sowetan:
Berig taxi-rampokkers slaan nou toe op skoolvervoer en eis afpersingsgeld van tot 15-duisend-rand. Een van die skoolbussies wat deur gewapende mans gesteel is, is by die Mosambiekse grens opgespoor.
# En The Citizen:
Skryf die Presidensie is besig om vure dood te slaan om die regering van nasionale eenheid te red te midde van die woordewisseling oor die Bela-wet.
VRYSTAAT:
# Volksblad in Bloemfontein:
Lei met dieselfde hoofberig as Beeld oor die Bela-wet.
En tweedens berig die koerant oor die afsterwe van die Suid-Afrikaanse atleet en professor aan die Universiteit van die Vrystaat, die 81-jarige De Villiers Lamprecht.
WES-KAAP:
# Die Burger:
Berig die stof het nog nie gaan lê oor die Wilgenhof-verslag nie en die aanbeveling is nou dat daar opgetree word teen Universiteit Stellenbosch se uittredende rektor, professor Wim de Villiers en die raadsvoorsitter Nicky Newton-King. Hulle het na bewering die verslag oor die koshuis verander sonder om enige ander partye in te lig.
En tweedens skryf die koerant oor ‘n busongeluk by Worcester wat die lewens van agt mense, waaronder ses kinders, geëis het. Die bus het omgeslaan.
# Cape Times:
Skryf oor die talle matriekpartytjies wat in kusdorpe gehou word.
En berig oor die Blitsbokke se teleurstellende sesde plek in Dubai.
OOS-KAAP:
# The Herald in Gqeberha:
Berig vir die vierde agtereenvolgende jaar sal daar geen vuurwerkvertonings, aanskakeling van liggies of strandfrontvertonings in Nelson Mandelabaai wees om die opening van die feesseisoen en Nuwejaar te vier nie.
En tweedens skryf die koerant ná ‘n dekade van vandalisme waartydens die Beachview-oord geplunder is, het die Nelson Mandelabaai-munisipaliteit ‘n bevel vir die sloping daarvan toegestaan.
KWAZULU-NATAL:
# Daily News in Durban:
Skryf die gelyke verskaffing van gesondheidsorg in Suid-Afrika was gister met Wêreld-Vigsdag onder die soeklig.
En ten slotte uit NAMIBIË:
# Republikein in Windhoek:
Berig terwyl vroeë uitslae dui op nóg ’n oorwinning vir Swapo, het die uittredende president sy misnoeë uitgespreek oor die wyse waarop die Verkiesingskommissie die verkiesing behartig het.
En tweedens skryf die koerant ‘n omstrede Chinese litiummynbouer se verwerkingsaanleg van 600-miljoen-rand en oopgroefmyne buite Uis staan volgens berigte sedert Maandag 18 November ledig.