Nuus 06:00

BULLETIN 2 Desember 6 vm

Goeiemôre. Ek is……..

In die bulletin:

# Adjunkpresident Mashatile sê Suid-Afrika het vordering gemaak om die VIGS-epidemie te hanteer
# ‘n Ondersoek is aan die gang om die oorsaak van ‘n dodelike busongeluk in Worcester te bepaal
# En rugby: Die Blitsbokke eindig in ’n teleurstellende sesde plek in Dubai

# Adjunkpresident Paul Mashatile sê Suid-Afrika het oor die afgelope jare aansienlike vordering gemaak om die MIV- en VIGS-epidemie te hanteer. Hy het gister die hoofrede gelewer by die amptelike herdenking van Wêreld-vigsdag in die Oos-Kaap. Daar is byna agt-miljoen mense wat met MIV leef, en TB bly die grootste oorsaak van sterftes, met ongeveer 56-duisend slagoffers per jaar. Mashatile sê wetenskaplikes is optimisties dat verbeterde behandelingsopsies voorkoming kan verbeter, en hulle werk aktief aan ‘n geneesmiddel en entstof:

Die minister van gesondheid, Aaron Motsoaledi sê intussen die regering sal kyk na versoeke vir MIV/VIGS-pasiënte om ses maande se antiretrovirale middels te kry. Die eis is gister op Wêreldvigsdag in die memorandum van die Treatment Action Campaign vervat. MIV is algemeen onder jong mense, veral adolessente meisies en jong vroue tussen die ouderdomme van 15 en 24, met ‘n weeklikse rekord van een-duisend-300 nuwe gevalle. Motsoaledi sê die land het vordering gemaak met die uitskakeling van MIV-verwante stigma en diskriminasie:

# ’n Ondersoek is aan die gang om die oorsaak te bepaal van ’n busongeluk wat die lewens van agt mense, insluitend ses kinders, op die N1 naby Rouxpark in Worcester geëis het. Twee-en-twintig passasiers het beserings opgedoen wat wissel van ernstig tot gering. Aanvanklike berigte dui daarop dat die bus van die Oos-Kaap na Kaapstad onderweg was toe dit omgeslaan het. Die LUR vir Mobiliteit, Isaac Sileku sê die veiligheid van padgebruikers bly hul hoogste prioriteit, en hulle loof die nooddienste en reaksiespanne wat onvermoeid werk onder uitdagende omstandighede.

# Die DA in Gauteng beweer die provinsiale gesondheidsdepartement se besluit om senior amptenare wat betrokke is by die AngloGold Ashanti-hospitaalopknappingsprojek weer aan te stel, wek ernstige kommer. Die amptenare, wat geskors is vir die onreëlmatige aanstel van kontrakteurs in ‘n projek wat opgeskiet het van 50-miljoen-rand tot 500-miljoen-rand, keer terug voor dissiplinêre verhore afgehandel is. Die DA-lid van die Staande Komitee oor Openbare Rekeninge, Alan Fuchs, sê die besluit ondermyn aanspreeklikheid, met opposisielede wat die etiek en bestuur van die departement bevraagteken. Fuchs vra duidelikheid oor die hantering van openbare vertroue.

# Die verkose Republikeinse president Donald Trump het die naweek gesê hy wil die voormalige nasionale veiligheidsamptenaar en ondersteuner, Kash Patel, aanstel om die FBI te lei. Dit beteken Trump is daarop uit om van die huidige direkteur, Christopher Wray, ontslae te raak. Patel, wat tydens Trump se eerste termyn die raadgewer van nasionale intelligensie en die minister van Verdediging was, het voorheen gevra die FBI se intelligensie-insamelingsrol moet geskrap word en personeel wat weier om Trump te steun moet afgedank word. Wray, ‘n Republikein wat Trump aangestel het, se tienjaarkontrak met die FBI verstryk eers in 2027.

# Rugby: Die Blitsbokke het ‘n teleurstellende sesde plek behaal by die Dubai Sewes. Hulle het met 17-15 teen Frankryk verloor in die uitspeelwedstryd om die vyfde plek nadat hulle in die kwarteindstryd met 24-17 deur Nieu-Seeland geklop is. Fidji het Spanje in die eindstryd met 17-5 verslaan om ‘n vroeë voorsprong in die 2024/25-seisoen te neem. Dit is die eerste keer in ses jaar dat ‘n ander span as die Blitsbokke in Dubai wen. Die afrigter Philip Snyman sê hul algehele vertoning was teleurstellend:

# En die finansiële aanwysers: Die rand verhandel teen 18-rand-10-sent teen die dollar, 19-rand-8-sent teen die euro en 22-rand-99-sent teen die pond. Bitcoin verhandel teen 97-duisend-458-dollar-84-sent. Die prys van goud is twee-duisend-648-dollar-39-sent per fynons en die prys van Brent ruolie 72-dollar-3-sent per vat.

Bly ingeskakel vir meer nuus……………….