Nuus 18:00

BULLETIN NUUSAGENTSKAP 29 November 6 nm

Goeiemiddag. Ek is……..

In die bulletin:

# Drie gewese Suid-Afrikaanse krieketspelers word aangekeer oor wedstrydknoeiery in 2016
# Ramaphosa vra verhoogde belegging in jeug-sportontwikkeling 
# En, AfriForum waarsku die Verenigde Nasies oor die gevare van Engelse oorheersing in die Suid-Afrikaanse onderwysstelsel

# Drie voormalige Suid-Afrikaanse krieketspelers is in hegtenis geneem in verband met wedstrydknoeiery gedurende die Ram Slam-uitdaging in die 2015/’16-seisoen. Die inhegtenisneming van Thami Tsolekile, Lonwabo Tsotsobe en Ethy Mbhalati volg op ondersoeke deur Krieket Suid-Afrika en die Valke. Tsolekile en Tsotsobe het vandag in die Gespesialiseerde Handelsmisdaadhof in Pretoria verskyn waar die saak tot Februarie uitgestel is. Mbhalati het reeds vroeër die maand voorgekom. Die saak word verbind met die oudspeler Gulam Bodi, wat in 2019 vyf jaar gevangenisstraf opgelê is omdat hy die tussenganger was vir wedstrydknoeiery met Indiese beroepswedders.

# President Cyril Ramaphosa vra verhoogde belegging in jeug-sportontwikkeling  om te verseker atlete van die toekoms het die geleentheid om sukses te behaal. Hy het by ‘n geleentheid in Pretoria vir medaljewenners op die Olimpiese en Paralimpiese Spele gewys op die belangrikheid om vennootskappe te versterk met plaaslike skole, gemeenskapsentrums en klubs om kinders landwyd toegang te gee tot sportprogramme. Ramaphosa sê om jeugontwikkeling te ondersteun is noodsaaklik om die volgende geslag atlete van wêreldgehalte op te lewer:

# AfriForum het die Verenigde Nasies se Forum oor Minderheidskwessies in Genève ingelig oor die potensiële gevaar van Engelse oorheersing in Suid-Afrika se onderwysstelsel weens die Wysigingswet op Basiese Onderwyswette. Alana Bailey van AfriForum waarsku die wet sal Afrikaanse gemeenskappe negatief beïnvloed en die oorbevolking in skole vererger. Sy vra die internasionale gemeenskap om druk op die regering uit te oefen om taalverskeidenheid in onderwys voorop te stel:

# Die Hooggeregshof in Mpumalanga het die menslike uitwissing van wild in Marlothpark gemagtig wat aan die Krugerwildtuin grens omdat daar tans ernstige oorbevolking is wat hongersnood en siektes veroorsaak. Dit volg op die Dierebeskermingsvereniging se pleidooi met verwysing na jare se wanbestuur. ‘n Interdik in 2017 het uitdunpogings verhoed. Volgens News24 het die Nkomazi-munisipaliteit die besluit verwelkom, met die klem op professionele bewaringspraktyke. Aanvullende voeding, veeartsenykundige sorg en bevolkingsbeheer sal nou ingestel word.

# Louise Haigh het bedank as Brittanje se minister van Vervoer ná onthullings dat sy skuldig gepleit het aan ‘n misdaad voordat sy ‘n lid van die Parlement geword het. Sy het haar bedanking ingedien nadat berigte in die media verskyn het oor hoe sy verkeerdelik aan die polisie gesê het haar werk-selfoon is in 2013 tydens ‘n rooftog gesteel. Sy het die foon later gevind, maar versuim om die polisie in kennis te stel. Die Britse media sê Haigh het in 2014 skuld erken op ‘n aanklag van bedrog en is laat gaan sonder enige verdere optrede.

# En die finansiële aanwysers: Die rand verhandel teen 18-rand-5-sent teen die dollar, 19-rand-4-sent teen die euro en 22-rand-88-sent teen die pond. Bitcoin verhandel teen 97-duisend-11-dollar. Die prys van goud is twee-duisend-659-dollar-80-sent per fynons en die prys van Brent-ruolie 72-dollar-75-sent per vat.

Bly ingeskakel vir meer nuus……………….