Nuus 15:00

BULLETIN NUUSAGENTSKAP 29 November 3 nm

Goeiemiddag. Ek is……..

In die bulletin:

# Adjunkpresident Paul Mashatile veroordeel die ongemagtigde BELA Wet-ooreenkoms
# Rugby: Die Blitsbokke is gereed vir die Dubaise Sewes-uitdaging
# En ‘n Australiese tienernuusbaas beskryf die verbod op sosiale media vir onder-16’s as ‘n swak idee

# Adjunkpresident Paul Mashatile sê die ooreenkoms rakende die Wysigingswet op Basiese Onderwyswette, wat tussen die minister van Basiese Onderwys, Siviwe Gwarube, Solidariteit en AfriForum bereik is, vorm nie deel van die amptelike regering van nasionale eenheid se prosesse nie. Hy het verduidelik die ooreenkoms omseil die goedgekeurde prosedures en ondermyn belangrike parlementêre en presidensiële rolle. Mashatile doen ‘n beroep op alle partye om te hou by die amptelike kanale. Hy het die versekering gegee dat gesprekke sal voortgaan om ‘n gesamentlike oplossing te vind, en verdere besonderhede oor die volgende vergadering sal binnekort bekendgemaak word.

# Die Gautengse polisiekommissaris, Tommy Mthombeni, berig ernstige misdaad het van April tot September in 15 van 17 gemeenskappe gedaal. Mthombeni wys op ‘n daling van 7,6-persent in kontakmisdade soos moord en aanranding. Daarbenewens is 413 spaza-winkels gesluit en 227 onwettige immigrante in hegtenis geneem. Volgens Mthombeni het seksmisdade, insluitend verkragting, egter gestyg, asook handelsmisdade en bedrog:

# Vrystellings-permithouers van Zimbabwe en Lesotho het tot die einde van die dag om aansoek te doen vir nuwe permitte of kwytskeldings, om hulle toe te laat om in Suid-Afrika te woon en te werk. Diegene wat versuim om aansoek te doen, moet versoeke indien ingevolge ‘n nuwe puntestelsel in Zimbabwe. Die besturende direkteur van Xpatweb, Marisa Jacobs, het aan Newzroom Afrika gesê vertragings by die VFS Global-kantore bemoeilik voorleggings, maar bestaande visumaansoekers is steeds beskerm tydens verwerking. Sy sê ook permithouers wat nie hul aansoeke indien nie, loop die gevaar dat hul onwettig in die land woon.

# Rugby: Die Blitsbokke is slaggereed vir die begin van die nuwe sewesseisoen hierdie naweek in Dubai. Hoofafrigter Philip Snyman sê sy groep is goed voorberei met die fokus op sterk verdediging en om besit om te keer. Suid-Afrika speel teen Australië, Kenia en Frankryk in Groep A. Volgens Snyman wil hulle voortbou op die bronsmedalje op die Olimpiese Spele in Parys:

# Die finansiële aanwysers: Die rand verhandel teen 18-rand-4-sent teen die dollar, 19-rand-5-sent teen die euro en 22-rand-89-sent teen die pond. Bitcoin verhandel teen 96-duisend-616-dollar. Die prys van goud is twee-duisend-663-dollar-67-sent per fynons en die prys van Brent-ruolie 72-dollar-21-sent per vat.

# Om mee af te sluit: ‘n Australiese tienernuusbaas sê wetgewing wat onder-16’s op sosiale media verbied, is ‘n baie swak idee wat die kreatiwiteit van jongmense sal smoor. Die 17-jarige Leo Puglisi se landwye nuusstromingsplatform word slegs deur tieners bedryf. Hy werk vanuit sy slaapkamer in sy ouerhuis in Melbourne. Puglisi het in 2019 begin om plaaslike nuusvideo’s op die YouTube-kanaal van Kanaal 6 Nuus te laai. Daar is nou tien verslaggewers van tussen 15 en hul laat tienerjare, met 29-duisend-600 intekenare en nog 40-duisend-700 op X.

Bly ingeskakel vir meer nuus……………….