Goeie Nuus

BULLETIN NUUSAGENTSKAP 29 November

Goeiemiddag. Hier is jou Goeie Nuus:

# Die bekroonde Suid-Afrikaanse filmregisseur Ian Gabriel se politieke riller, Death of a Whistleblower, open vandag die 32ste Afrika-diaspora Internasionale Rolprentfees in New York. Die rolprent met Rob van Vuuren en Noxolo Dlamini speel af teen die agtergrond van ‘n gevaarlike sameswering wat militêre korrupsie en onwettige wapenhandel insluit. Dit is deel van ‘n uiteenlopende program van 65 rolprente op die fees, insluitend 12 van Suid-Afrika.

# Die organisasie 67 Blankets for Nelson Mandela Day doen ‘n beroep op Suid-Afrikaners om die grootste gelukskombers ooit te skep. Bydraers sal saam werk om komberse te maak wat dan een reuse-kombers sal vorm. Die vertoonstuk sal ‘n heldergeel glimlag-emoji in die middel hê met blou oë en ‘n rooi glimlag teen ‘n veelkleurige gestreepte agtergrond. Die organisasie sonder winsbejag sê die skouspelagtige kombers sal op 20 Maart volgende jaar by die Nelson Mandela-universiteit te sien wees, ter viering van die Verenigde Nasies se Internasionale Geluksdag.

# Camphill Village West Coast in Kaapstad gaan gasheer speel vir ‘n Internasionale Gestremheidsbewustheids-sportdag om inklusiwiteit en pret te vier. Deelnemers, insluitend spanne van Houtbaai United Football Community, en die Stad Kaapstad se Football Club Deaf Society Outreach gaan op ses Desember meeding in speletjies soos aflos, sokker, netbal, vlugbal en dans. Die byeenkoms is deel van planne om die Internasionale Dag vir Mense met Gestremdhede te gedenk.

# Jon Batiste, Trombone Shorty, Lauren Daigle en Ledisi sal op 9 Februarie die hoofkunstenaars wees op die Super Bowl-vertoning voor die wedstryd in Caesars Superdome in New Orleans. Batiste sal die Amerikaanse volkslied sing, Shorty en Lauren Daigle America the Beautiful, en Ledisi Lift Every Voice and Sing. Kendrick Lamar sal die hoofkunstenaar wees tydens die rustydvertoning. NFL se hoof van musiek, Seth Dudowsky, sê die kunstenaars sal New Orleans se energie, siel en lewendige klanke na ‘n wêreldverhoog bring.

# En ten slotte: Die Franse president, Emmanual Macron, lei vandag ‘n toer wat op televisie uitgesaai word van die opgeknapte Notre Dame om die heropening te gedenk. Die ikoniese katedraal in Parys is in 2019 in ‘n brand beskadig. Sowat twee-duisend mense, insluitend skrynwerkers, kunskenners, beeldhouers en ingenieurs, het aan die projek gewerk. Macron en die aartsbiskop van Parys, Lauren Ulrich, sal die seremonie open wat sal lei tot ‘n amptelike opening vir die pulbiek volgende Saterdag en die eerste Katolieke Mis Sondag.

Bly ingeskakel vir meer nuus……………….