Eko-minuut 13:30

BULLETIN NUUSAGENTSKAP 29 November 1:30 nm

Goeiemiddag. Hier is jou Eko-minuut:

# Charge, voorheen bekend as Zero Carbon Charge, het sy eerste elektriese voertuig-laaistasie buite die kragnetwerk in Wolmaransstad, Noordwes, bekendgestel. Die stasie is deel van ‘n nasionale netwerk van 120 sonkraggedrewe aanlegte wat langs Suid-Afrika se groot hoofweë beplan word. Daar is ses gelykstroom-snellaaipunte en twee laaipunte met wisselstroom, wat ‘n voertuig binne 25 minute kan laai. Charge wil die oorgang na elektriese voertuie ondersteun. Eienaars van die grond verdien vyf-persent van die inkomste. Plaaslike en provinsiale regerings ondersteun die projek.

# Pick n Pay het 16 nuwe omkeeroutomate in Gauteng bygevoeg in vennootskap met Imagined Earth en Coca-Cola Beverages South Africa. Daar is landwyd nou altesaam 30. Die masjiene is geïntegreer met die Smart Shopper-program en beloon gebruikers vir die herwinning van plastiekbottels, blikkies en meer. Volgens die winkelgroep verdien klante punte deur strepieskodes te skandeer en dit via die Imagined Earth-toepassing te koppel. Sedert 2018 is meer as 480-duisend items met hierdie veldtog herwin, wat volhoubaarheid en ekovriendelike gewoontes bevorder.

# En ten slotte: Sowat 12-duisend sterftes jaarliks in Nieu-Delhi, Indiaë, kan spesifiek verbind word met lugbesoedeling. Dit is volgens die 2024 State of Global Air-verslag. Die verslag sê 464 kinders onder die ouderdom van vyf sterf daagliks in Indië weens lugbesoedeling en dis die grootste oorsaak van sterftes – selfs meer as tabak en diabetes. Die Wêreldbank het vroeër vanjaar gesê Indië moet op sub-nasionale vlak optree vir doeltreffende besoedelingsbeheerstrategieë. Lugbesoedeling het in 2021 die dood van 8,1 miljoen mense wêreldwyd veroorsaak.

Bly ingeskakel vir meer nuus……………….