Oggendkoerant-verslag
Die hooftrekke uit die belangrikste nuusblaaie soos op 29 November 2024:
NASIONAAL:
# Business Day:
Berig die Black Business Council het die Hooggeregshof se besluit verwelkom om die verkoop van die 1,4-miljard-rand Bryanston-kampus van Dimension Data nietig te verklaar. Die raad sê daar is saamgesweer om breë-gebaseerde Swart Ekonomiese Bemagtiging te omseil.
# En Mail & Guardian op Vrydae:
Skryf dit is openlik oorlog tussen die EFF en die MK-party. Die koerant berig MK wil kleiner partye insluk om sy posisie te versterk.
GAUTENG:
# Beeld:
Lei met die deurbraak wat bereik is met die ooreenkoms tussen Solidariteit en die minister van Basiese Onderwys oor die toepassing van die klousules in die Bela-wet oor taal en toelatingsbeleid. Die klousules sal aanvanklik nie afgedwing word nie.
En tweedens berig die koerant die druk oor die wetgewing sal nou volgens ontleders deels van president Cyril Ramaphosa verskuif na die Onderwysminister, Siviwe Gwarube.
# The Star & Pretoria News:
Berig die stryd oor straatname in Sandton is besig om toe te neem.
En skryf die Departement van Basiese Onderwys gaan die matriekuitslae publiseer.
# Sowetan:
Skryf oor ‘n huis van 1,5-miljoen-rand wat as deel van ‘n egskeidingsgeding vir een-duisend-rand verkoop is. Die hof het beslis die transaksie is onwettig.
# En The Citizen:
Skryf die ANC het sy hele uitvoerende komitee in KwaZulu-Natal na Luthuli-huis ontbied en die aanduiding is hulle gaan afgedank word weens die ANC se swak prestasie in die verkiesing.
VRYSTAAT:
# Volksblad in Bloemfontein:
Lei ook met die deurbraak met die Bela-wet.
En tweedens skryf die koerant ‘n apteker van Ficksburg is in hegtenis geneem oor ammunisie wat by sy huis gevind is.
WES-KAAP:
# Die Burger:
Het dieselfde hoofberig oor die Bela-wet as Beeld en Volksblad.
En tweedens word berig die Hooggeregshof in Kaapstad het beslis ‘n drankmaatskappy mag nie sy maroela-likeur onder die naam Afrula bemark nie omdat dit die handelsnaam Amarula benadeel.
# En Cape Times:
Berig ook die matriekuitslae gaan soos gewoonlik gepubliseer word.
En skryf afpersingsindikate is nou ook by inlywingskole bedrywig
OOS-KAAP:
# The Herald in Gqeberha:
Berig die Nelson Mandelabaai-munisipaliteit het goedkeuring verkry om Airport Valley-inwoners met uitsettingskennisgewings te bedien.
En skryf ‘n ma van Gqeberha, Shayhieda Dollie, is tot 25 jaar gevonnis nadat sy haar dwelmverslaafde seun vermoor het.
KWAZULU-NATAL:
# Daily News in Durban:
Skryf inwoners het ‘n beplande laekoste behuisingsprojek in eThekwini verwerp en die stad met regstappe gedreig indien hy sou voortgaan met bouwerk.
En ten slotte uit NAMIBIË:
# Republikein in Windhoek:
Berig Swapo het net bo 40-persent behaal in die vroeë parlementêre verkiesingsuitslae, terwyl sy presidentskandidaat Netumbo Nandi-Ndaitwah net onder die uiters belangrike 50-persent-kerf staan.
Dan skryf die koerant vir die handhawing van die menseregte van elke persoon wat met MIV/vigs saamleef of ’n risiko vir die siekte het, is dit noodsaaklik om vigs teen 2030 uit te roei.