Nuus 18:00

BULLETIN NUUSAGENTSKAP 28 November 6 nm

Goeiemiddag. Ek is……..

In die bulletin:

# AfriForum verwelkom die skikking oor die BELA-wet by Nedlac
# Sewentien onwettige mynwerkers kom na die oppervlak by die Stilfontein-myn
# En, motorsport: Monza gaan die Grand Prix tot minstens 2031 aanbied

# AfriForum het die Solidariteitsbeweging en die regering se skikking oor die BELA-wet by die Nasionale Ekonomiese en Arbeidsraad, Nedlac, verwelkom. Woordvoerder Kallie Kriel sê die omstrede artikels sal nie op 13 Desember van krag word nie, hangend die ontwikkeling van norme, standaarde en beleid. Skole wat vol is, sal ook beskerm word teen gedwonge wysigings aan taal- en toelatingsbeleid. Kriel loof die ooreenkoms as ‘n oorwinning vir moedertaal-onderrig:

# President Cyril Ramaphosa herbevestig die regering se verbintenis om voedselonsekerheid en voedseloordraagbare siektes teen te werk, veral in verarmde gemeenskappe. Hy het tydens sy jaarlikse toespraak in die Nasionale Raad van Provinsies erken byna ‘n kwart van huishoudings in Suid-Afrika het nie volledig toegang tot voedsel nie. Volgens Ramaphosa het inspeksies van meer as 200-duisend spaza-winkels vermeerder na die onlangse vlaag voedselverwante siektes. Hy sê meer as ‘n duisend winkels is gesluit om openbare gesondheid te beskerm:

# Nog 17 onwettige mynwerkers is weer bogronds by mynskagte in Stilfontein, Noordwes. Veertien het uit die Margaret-skag te voorskyn gekom en drie uit Skag 10. Polisiewoordvoerder Sabata Mokgwabone bevestig 14 van hulle is van Lesotho, Zimbabwe en Mosambiek. ‘n Negentienjarige mynwerker het op die toneel aan die media vertel hy het oorleef deur tandepasta te eet. Intussen het 300 onwettige mynwerkers in die plaaslike Landdroshof verskyn op aanklagte van onder meer onwettige mynbou en oortreding van immigrasiewette. Reddingspanne en die polisie is steeds by verskeie skagte ontplooi.

# Die polisie het die voormalige Wes-Kaapse hoof van misdaadintelligensie, Mzwandile Tiyo, se afdanking herroep. Hy word egter aangemoedig om vroeër af te tree ná sy aanvanklike afdanking oor ‘n ondersoek na sy geskiktheid om die amp te beklee. Die bewerings teen Tiyo sluit in, die misbruik van hulpbronne en wangedrag. Die besluit het heftige reaksie ontketen. Die voorsitter van die Parlementêre portefeuljekomitee vir Polisie, Ian Cameron, het die stap gekritiseer en dit bestempel as onlogies en skadelik vir die polisie se geloofwaardigheid.

# Motorsport: Monza, naby die Italiaanse stad Milaan het die aanbiedingsregte vir ‘n Grand Prix tot minstens 2031 bekom. Die beroemde renbaan het die bynaam “Tempel van Spoed” omdat motors dikwels snelhede van meer as 350-kilometer per uur behaal. Monza het ‘n Grand Prix feitlik elke jaar aangebied sedert die eerste wêreldkampioenskap in 1950 – behalwe in 1980 toe die baan opgradeer is. Die president en uitvoerende hoof van Formule Een, Stefano Domenicali, sê Monza met sy unieke atmosfeer is die middelpunt van Formule Een-geskiedenis.

# En die finansiële aanwysers: Die rand verhandel teen 18-rand-13-sent teen die dollar, 19-rand-11-sent teen die euro en 22-rand-97-sent teen die pond. Bitcoin verhandel teen 95-duisend-921-dollar. Die prys van goud is twee-duisend-646-dollar-2-sent per fynons en die prys van Brent-ruolie 72-dollar-65-sent per vat.

Bly ingeskakel vir meer nuus……………….