Oggendkoerant-verslag
Die hooftrekke uit die belangrikste nuusblaaie soos op 27 November 2024:
NASIONAAL:
# Business Day:
Berig die ouditeur-generaal Tsakani Maluleke sê die aantal skoon oudits vir nasionale en provinsiale regeringsdepartemente het met 50-persent gestyg.
GAUTENG:
# Beeld:
Berig die Hoërskool Waterkloof in Pretoria sê sy gemeenskap staan steeds bankvas agter hom te midde van die polemiek oor die skoolhoof, Louis Perold.
Dan skryf die koerant ‘n bloukraanvoël-egpaar wat twee jaar gelede van Roodeplaat na die Austin Roberts-voëlreservaat verskuif is, het hul eerste kleintjie.
En laastens word berig Duitsland is besig om bomskuilings te bou uit vrees vir ‘n moontlike aanval uit Rusland.
# The Star & Pretoria News:
Skryf die leier van die EFF, Julius Malema sê president Cyril Ramaphosa moet aanspreeklikheid aanvaar vir die Phala Phala-kwessie.
En berig die NVG sê hy het ‘n sterk saak teen die voormalige voorsitter van SAA Tegnies, Yakhe Kwinana.
# Sowetan:
Berig die ma van die tweejarige Kutlwano Shalaba het in die hof verskyn nadat sy haar seuntjie na bewering verkoop het. Sy het vroeër beweer die kind is ontvoer.
# En The Citizen:
Skryf die regering is baie kwesbaar om kuberkrakers ten prooi te val.
VRYSTAAT:
# Volksblad in Bloemfontein:
Berig oor die stinkende slikwater wat uit die krane van inwoners in Parys vloei.
Tweedens skryf die koerant ‘n man van Bloemfontein moet ses-miljoen-rand opdok nadat hy die bestuurder van Cobra-insleepdiens in ‘n kroeg aangerand het.
En laastens word berig die skietstilstand tussen Israel en Hizbollah is ‘n werklikheid.
WES-KAAP:
# Die Burger:
Berig die minister van Korrektiewe Dienste, dr. Pieter Groenewald het ‘n ondersoek gelas na die sowat 35-miljoen-rand wat amptenare die afgelope vyf jaar aan reis en verblyf bestee het.
Dan skryf die koerant kaartjies vir die glansdinee wat die MK-party se eerste bestaansjaar vier kan tot twee-miljoen-rand per kop kos.
En laastens is daar nuus oor die wêreld se oudste man, die 112-jarige Brit, John Tinniswood wat oorlede is.
# En Cape Times:
Skryf die Phala Phala-kwessie is nou in die Konstitusionele Hof se hande.
En berig tweedens ook oor die tweejarige wat glo verkoop is.
OOS-KAAP:
# The Herald in Gqeberha:
Berig faksiegevegte oor ‘n behuisingsprojek het spanning in die Walmer-township aangewakker. Daar is bewerings van sabotasie en intimidasie.
En tweedens skryf die koerant die Oos-Kaapse regering wil meer geld in die vermaaklikheidsbedryf pomp deur filmateljees in die provinsie te bou.
KWAZULU-NATAL:
# Daily News in Durban:
Berig die Inkomstediens bygestaan deur die polisie het ‘n klopjag uitgevoer op die eiendom van ‘n bekende KwaZulu-Natalse sakevrou, Shauwn Mkhize, ook bekend as MaMkhize.
En ten slotte uit NAMIBIË:
# Republikein in Windhoek:
Dit is vandag verkiesingsdag in Namibië en die land se president Nangolo Mbumba het Namibiërs versoek om demokratiese tradisies te handhaaf.
En tweedens skryf die koerant die raadsvoorsitter van die Namibië Nasionale Boere-unie, Vetuundja Kazap het boere en plaaswerkers aangemoedig om aan die nasionale verkiesing deel te neem.