Nuus 09:00

BULLETIN 26 November 9 vm

Goeiemôre. Ek is……..

In die bulletin:

# Die Vervolgingsgesag sê die vertragings in Jacob Zuma se verhoor is nie in belang van geregtigheid nie
# Cosatu sê die tekortkominge oor geslagsgeweld in die strafregstelsel moet aangespreek word
# En Charlize Theron gaan ook deel wees van Christopher Nolan se nuwe fliek

# Die Nasionale Vervolgingsgesag sê dit sal tot nadeel van geregtigheid wees indien oudpresident Jacob Zuma toegelaat word om sy korrupsiesaak weereens uit te stel. Zuma se prokureurs het gesê indien sy tweede probeerslag om staatsaanklaer Bill Downer te verwyder, misluk, sal hy die Appèlhof nader. In dokumente wat by die KwaZulu-Natalse Hooggeregshof in Pietermaritzburg ingedien is, sê die NVG die saak kan en moet in April 2025 voortgaan met Downer as hoofaanklaer.

# Cosatu sê terwyl die 16 Dae van Aktivisme vir Geen Geweld teen Vroue en Kinders nie aan die gang is, moet die regering tekortkominge in die strafregstelsel aanspreek. In Suid-Afrika word ‘n vrou elke drie ure vermoor; en meer as 50-persent hiervan is deur ʼn intieme lewensmaat. Cosatu-woordvoerder Zanele Sabela sê die tekortkominge in die regstelsel is deeglik deur oorlewendes van geslagsgeweld opgeteken. Dit wissel van swak behandeling deur polisiebeamptes tot ʼn gebrek aan behoorlike beskerming teen die oortreders:

# Die DA in Gauteng sê die LUR vir Finansies, Lebogang Maile, gaan maniere moet vind om gehaltediens te lewer met minder geld. Die LUR gaan vandag die Aansuiweringsbegroting vir 2024/2025 voorlê. Dorianne Arendse van die DA sê die provinsiale regering se besluit om die verantwoordelikheid te neem vir die betaling van ‘n gedeelte van die e-tol-skuld, laat vrae ontstaan oor wat in die slag gaan bly, omdat daar minder geld beskikbaar gaan wees vir dienslewering:

# Krieket: Die 13-jarige Vaibhav Suryavanshi het die jongste speler geword wat in die Indiese Premierliga gekoop is toe die Rajasthan Royals hom vir 2,4-miljoen-rand aangeskaf het. Op die tweede dag van die IPL-veiling gister het die Delhi Capitals vier-miljoen rand vir die gewese Protea-kaptein, Faf du Plessis betaal. Die veelsydige Marco Jansen is deur die Punjab Kings opgeraap vir 14-miljoen-rand, terwyl die Mumbai Indians die paaltjiewagter-kolwer Ryan Rickelton vir twee-miljoen-rand gekoop het. Suid-Afrika se tienersensasie, Kwena Maphaka, gaan teen 3,2-miljoen rand vir die Rajasthan Royals speel.

# Die finansiële aanwysers: Die rand verhandel teen 18-rand-7-sent teen die dollar, 18-rand-94-sent teen die euro en 22-rand-68X-sent teen die pond. Bitcoin verhandel teen 94-duisend-210-dollar-89-sent. Die prys van goud is twee-duisend-628-dollar-59-sent per fynons en die prys van Brent ruolie 72-dollar-62-sent per vat.

# En ter afsluiting: Die Oscar-wenner Charlize Theron het by die sterbelaaide rolverdeling van Christopher Nolan se nuwe fliek aangesluit. Besonderhede oor die film se storielyn is nog ʼn geheim. Die Suid-Afrikaanse akteur, vervaardiger en filantroop sluit aan by bekendes soos Matt Damon, Tom Holland, Anne Hathaway, Zendaya, Lupita Nyong’o en Robert Pattinson. Universal en Nolan se opvolg van hul Oscar-bekroonde drama, Oppenheimer, se vervaardiging begin na verwagting middel volgende jaar.

Bly ingeskakel vir meer nuus……………….