Nuus 16:00

BULLETIN NUUSAGENTSKAP 25 November 4 nm

Goeiemiddag. Ek is……..

In die bulletin:

# Julius Malema glo onwrikbaar in Zuma se korrupsie ten spyte van persoonlike respek vir hom
# ‘n Nuwe wending in die moordsaak teen die Menendez-broers van Amerika wat al 30-jaar agter tralies is vir die moord op hulle ouers
# En, rugby: England se kaptein is opgewonde oor hoe ver die span kan vorder

# Die EFF-leier, Julius Malema, het sy standpunt oor oudpresident Jacob Zuma se korrupsie herbevestig, ten spyte van sy persoonlike respek vir hom. Hy beklemtoon sy kritiek is gegrond op beginsel en het verwys na die Openbare Beskermer se bevindings en die Konstitusionele Hof se beslissing dat Zuma die geld wat met die Nkandla-skandaal verband hou, moet terugbetaal. Malema het dit duidelik gestel, al handhaaf hy ‘n respekvolle verhouding met Zuma sal hy nie skroom om hom aanspreeklik te hou vir sy dade nie:

# Die minister van Polisie, Senzo Mchunu, het aangekondig daar was ‘n afname van 5,1-persent in ernstige misdade wat van Julie tot September aangemeld is. Hy versoek gespesialiseerde fokus op geslagsgeweld en vrouemoord, en sterker optrede teen georganiseerde en ekonomiese misdade, insluitend afpersing en aanvalle op kritieke infrastruktuur. Mchunu het opgemerk verkragtingsake het met 3,1-persent afgeneem, terwyl roof by huis- en nie-residensiële persele met onderskeidelik 1,3- en 21,1-persent afgeneem het:

# Human Rights Watch sê Mosambiekse veiligheidsmagte het die dood van ten minste 10 kinders veroorsaak en talle is beseer in verkiesingsgeweld. Oproerigheid heers in die land sedert die verkiesing op 9 Oktober, wat die regerende Frelimo-party gewen het. Die party is sedert Mosambiek se onafhanklikwording aan bewind, maar die opposisie betwis die uitslag. Duisende mense het die afgelope weke oor die hele land betoog en die polisie het dit met geweld onderdruk. Die menseregte-groep sê minstens 36 kinders is tydens die betogings gewond. Die owerhede het nie op die bewerings gereageer nie.

# Die Amerikaanse broers Lyle en Erik Menendez kan vrygelaat word nadat hulle meer as 30 jaar agter tralies deurgebring het vir die moord op hul ouers. Die broers sal vandag per videoskakel in die hof verskyn om die volgende stappe in hul saak te bespreek, nadat Los Angeles se distriksaanklaer ingestem het om die saak weer te ondersoek. Lede van die Menendez-familie het ‘n openbare pleidooi gerig vir die broers se vrylating. Hulle beweer hulle pa het hulle blootgestel aan gewelddadige seksuele misbruik. Die familie meen die broers is nie ‘n gevaar vir die samelewing nie.

# Rugby: Engeland se kaptein, Jamie George, sê baie positiewe aspekte kan uit hierdie jaar geneem word. Steve Borthwick se span het gister op Twickenham nege drieë gedruk in hulle maklike oorwinning van 59-14 oor Japan – hulle laaste wedstryd van die jaar. Die sege het verseker dat Engeland ses agtereenvolgende loesings afgeweer het. George sê hy is opgewonde oor hoe ver die span kan vorder as mens kyk na die ouderdoms- en ondervindingverdeling:

# En die finansiële aanwysers: Die rand verhandel teen 18-rand-6-sent teen die dollar, 18-rand-93-sent teen die euro en 22-rand-69-sent teen die pond. Bitcoin verhandel teen 98-duisend-180-dollar. Die prys van goud is twee-duisend-682-dollar-43-sent per fynons en die prys van Brent-ruolie 74-dollar-51-sent per vat.

Bly ingeskakel vir meer nuus……………….