Nuus 06:00

BULLETIN 25 November 6 vm

Goeiemôre. Ek is……..

In die bulletin:

# Die DA sê  die Loterykommissie se korrupsiesake moet afgehandel word
# Krieket: Die Protea-vroue verloor teen Engeland in hul eerste T20
# En Breyten Breytenbach is oorlede

# Die DA moedig die Nasionale Loterykommissie aan om sy korrupsiesake af te handel sodat die herwinning daarvan kan begin. Die woordvoerder van die party oor Handel, Nywerheid en Mededinging, Toby Chance, sê ondersoeke deur die Valke, die Spesiale Ondersoekeenheid en die Nasionale Vervolgingsgesag het afgekom op 15-miljard-rand se bedrieglike toelaes. Hy sê hoewel vordering gemaak is, is nog optrede nodig om diegene wat verantwoordelik is te vervolg om bedrog in die toekoms te voorkom:

# COPE verwelkom die uitskop van Jacob Zuma uit die ANC, wat hulle standpunt herbevestig oor sy gekompromiteerde leierskap. Die party herhaal hulle het die ANC verlaat oor Zuma se omstrede verlede, en verwys na die Khwezi-verkragtingsaak en die Schabir Shaik-verhoor. COPE sê die ANC het die verkiesingskade verdien wat veroorsaak is deur Zuma se MK-party weens die selfdienende, korrupte leiers wat die ANC se huidige karakter bepaal.

# Adjunkpresident Paul Mashatile lei vandag die bekendstelling van die 16 Dae van Aktivismeveldtog in Rustenburg in Noordwes. Die woordvoerder Linah Ledwaba sê die veldtog wil stereotipes uitdaag en geslaggelykheid bevorder, terwyl ‘n beroep gedoen word vir ‘n verenigde poging om geweld teen vroue en kinders stop te sit:

# Nog ‘n kind is dood in ‘n beweerde voedselvergiftigingsvoorval. Dit is ‘n agtjarige graad 2-leerder van die Thabisile Primary School in Diepkloof, Soweto. Die leerder het na bewering siek geword nadat hy verlede Woensdag beskuitjies van ‘n plaaslike spaza-winkel geëet het. Die woordvoerder van die Gautengse Onderwysdepartement, Steve Mabona, sê die relevante owerhede sal die omstandighede rondom hierdie tragiese voorval ondersoek:

Krieket: Engeland se Vroue het Suid-Afrika met vier paaltjies in die eerste T20 op Buffalo Park in Oos-Londen verslaan en ‘n voorsprong van een-nul in die reeks van drie geneem. Die Proteas het 142 vir vyf in hul 20 boulbeurte aangeteken met Nadine de Klerk op ‘n onoorwonne 29. In antwoord het Nat Sciver-Brunt 59 aangeteken en die besoekers het die teiken bereik met vier balle oor. Vir Engeland was dit die eerste wedstryd sedert hul in Oktober uit die groepsfase van die T20 Wêreldbeker geval het. Die tweede T20 word Woensdag in Benoni gespeel.

# Die finansiële aanwysers: Die rand verhandel teen 18-rand teen die dollar, 18-rand-87-sent teen die euro en 22-rand-65-sent teen die pond. Bitcoin verhandel teen 97-duisend-712-dollar-20-sent. Die prys van goud is twee-duisend-716-dollar-33-sent per fynons en die prys van Brent ruolie 75-dollar-27-sent per vat.

# En om mee af te sluit: Die bekende Suid-Afrikaanse digter, romanskrywer, skilder en aktivis, Breyten Breytenbach is gister in Parys op 85 oorlede. In ‘n verklaring sê sy familie Breytenbach het by Okhela, ‘n ideologiese vleuel van die ANC in ballingskap, aangesluit en is gevange geneem met sy terugkeer na Suid-Afrika in 1975. Hulle sê ten spyte hiervan het sy artistieke en literêre bydraes gefloreer, wat sy plek bevestig het as een van Suid-Afrika se moedigste en visioenêre figure. Van Breytenbach se bekende werke sluit in The True Confessions of an Albino Terrorist en Die ysterkoei moet sweet.

Bly ingeskakel vir meer nuus……………….