Nuus 17:00

BULLETIN NUUSAGENTSKAP 22 November 5 nm

Goeiemiddag. Ek is……..

In die bulletin:

# Noordwes se regering hou die vordering dop met die reddingspoging vir onwettige mynwerkers in Stilfontein
# Tennis: Vier spanne bly oor in die wedloop om die gesogte Davisbeker-titel
# En, Suid-Afrika is boaan die Verenigde Nasies se lys vir seksuele uitbuiting in vredesoperasies

# Die portefeuljekomitee oor Gemeenskapsveiligheid in Noordwes se wetgewer het vandag die vordering met reddingspogings van onwettige mynwerkers in Stilfontein dopgehou. Hulle het ‘n toesigbesoek gedoen om te verseker alle belanghebbendes, insluitend die polisie en reddingspanne, vervul hul rolle. Meer as een-duisend-400 mynwerkers het tot dusver uit die myntonnels gekom. Die komitee se woordvoerder, Freddy Sonakile, sê gesprekke is aan die gang om soortgelyke voorvalle te voorkom:

# Suid-Afrika se program van 175-miljoen-rand vir die beskerming van toeriste word wyd gekritiseer oor die koste en omdat monitors nie behou word nie. Ondersteuners glo dit kan misdaad verminder en werk skep, maar kritici voel dit misluk tensy toerismemonitors na opleiding van 12 maande, aanbly. Business Tech berig die program, met monitors wat belangrike besienswaardighede patrolleer en toeriste bystaan, het ontoereikende data oor die uitwerrking daarvan. Ondanks uitdagings, moet die veldtog veiligheid verbeter in ‘n sektor wat deurslaggewend is vir Suid-Afrika se ekonomie.

# China het ‘n beroep gedoen vir kalmte en selfbeheersing deur alle partye in die Oekraïnse oorlog nadat Rusland bevestig het hy het ‘n eksperimentele hipersoniese ballistiese missiel afgevuur. Die ministerie van Buitelandse Sake se woordvoerder, Lin Jian, het ‘n beroep op alle partye gedoen om die situasie deur dialoog en raadpleging af te skaal, en voorwaardes te skep vir ‘n vroeë wapenstilstand. Die Russiese president, Vladimir Putin, sê die konflik in Oekraïne toon kenmerke van ‘n wêreldoorlog en hy sluit nie aanvalle op Westerse lande uit nie.

# Tennis: Vier spanne bly oor in die wedloop om die Davisbeker-titel in Málaga, Spanje. Nederland speel vanaand teen Duitsland in die eerste halfeindstryd na oorwinnings oor Spanje en Kanada onderskeidelik. Die verdedigende kampioen, Italië, speel môre in die tweede halfeindstryd teen die 28-malige kampioen, Australië. Italië het Argentinië 2-1 geklop terwyl Australië met Amerika afgereken het. Die wenners van Sondag se eindstryd sal prysgeld van 48,4-miljoen-rand deel en die naaswenners kry 29-miljoen-rand. Amerika hou steeds die rekord van 32 titels sedert die ontstaan van die kompetisie in 1900.

# Die finansiële aanwysers: Die rand verhandel teen 18-rand-3-sent teen die dollar, 18-rand-79-sent teen die euro en 22-rand-57-sent teen die pond. Bitcoin verhandel teen 98-duisend-354-dollar. Die prys van goud is twee-duisend-700-dollar-54-sent per fynons en die prys van Brent-ruolie 73-dollar-21-sent per vat.

# En ten slotte: Suid-Afrika is boaan die Verenigde Nasies se lys vir seksuele uitbuiting en mishandeling tydens vredesoperasies. Die VN onthul daar was meer as 700 vaderskap-eise sedert 2006, met 85-persent vir militêre vredesmagte. Hiervan was 111 eise teen Suid-Afrikaanse soldate. Suid-Afrika het onderneem om saam met die VN te werk om hierdie eise op te los. Die sekretaris-generaal van die VN, Antonio Guterres, versoek lidlande om aandag te gee aan kwessies van vaderskap en ondersteuning van kinders:

Bly ingeskakel vir meer nuus……………….