Nuus 12:00

BULLETIN NUUSAGENTSKAP 22 November 12 nm

Goeiemiddag. Ek is……..

In die bulletin:

# Vodacom is van mening sy uitvoerende hoof moet die vergoeding bepaal in die ‘Please call Me’-saak
# City Power verleng sy kantoorure om die opgradering van koopkragmeters te bespoedig
# En, rugby: Die veterane Sam Cane en TJ Perenara speel hulle laaste toets vir die All Blacks teen Italië

# Vodacom se regsverteenwoordiger, Wim Trengove, het in die Konstitusionele Hof gesê slegs die uitvoerende hoof van die onderneming, Shameel Joosub, kan billike vergoeding bepaal vir die skepper van Please Call Me, Nkosana Makate. Dit volg op ‘n bevel van die Appèlhof dat Vodacom sedert 2001 5- tot 7,5-persent van die diens se inkomste aan Makate verskuldig is, met ramings wat wissel tussen nege- en 63-miljard-rand. Vodacom se appèl verwys na prosedurele foute en die moontlike finansiële uitwerking op sy bedrywighede en sy belanghebbendes.

# City Power in Johannesburg het sy bedryfsure tot sewe-uur saans verleng in ‘n poging om die opgradering van koopkragmeters voor Sondag se spertyd af te handel. Sowat ‘n duisend kliënte se meters moet nog bygewerk word, waarvan 562 net in Alexandra. City Power se woordvoerder, Isaac Mangena, sê in Midrand is 255 huishoudings se meters nog uitstaande, hoofsaaklik weens adres-probleme:

Die Midvaal-munisipaliteit in Gauteng sê intussen hy het die kragmeteromskakeling voor die sperdatum afgehandel. Eskom het ‘n beroep op alle voorafbetaalde kliënte gedoen om hul meters onmiddellik te laat bywerk om onverwagte kragverlies te vermy. Idah Satikhe van die munisipaliteit sê dié opdatering was nodig as gevolg van ‘n vervaldatum wat ingebou is in die kode van Standaard Oordragspesifikasie vir voorafbetaalde elektrisiteitsmeters, die belangrikste stelsel in Suid-Afrika:

# Die sekretaris-generaal van die Verenigde Nasies, Antonio Guterres, het ‘n ernstige beroep op leiers en onderhandelaars gedoen om hul verskille opsy te skuif en ‘n ooreenkoms oor klimaatfinansiering te bereik. Dit volg te midde van die afsluiting van COP29 vandag in Baku, Azerbeidjan. Onderhandelaars is haaks oor ‘n nuwe teiken vir die finansiering van klimaatsveranderingshulp aan lande wat onder natuurrampe deurloop. Guterres waarsku dat die versuim om ‘n ooreenkoms te bereik, klimaatsverandering kan versnel:

# Rugby: Die veterane Sam Cane en TJ Perenara speel môreaand hulle laaste toets vir die All Blacks in La Nucia teen Italië. Cane, die gewese kaptein wat in 103 toetse vir Nieu-Seeland gespeel het, sal die nommer 7-trui dra, en die skrumskakel Perenara sal sy 89ste toets op die bank begin. Albei gaan volgende jaar in Japan speel en is dan nie vir die nasionale span verkiesbaar nie. Hoofafrigter Scott Robertson het vyf veranderings aangebring aan die span wat verlede naweek naelskraaps teen Frankryk verloor het.

# En die finansiële aanwysers: Die rand verhandel teen 18-rand-4-sent teen die dollar, 18-rand-88-sent teen die euro en 22-rand-68-sent teen die pond. Bitcoin verhandel teen 99-duisend-322-dollar. Die prys van goud is twee-duisend-697-dollar-70-sent per fynons en die prys van Brent-ruolie 74-dollar-31-sent per vat.

Bly ingeskakel vir meer nuus……………….