Oggendkoerant-verslag
Die hooftrekke uit die belangrikste nuusblaaie soos op 22 November 2024:
NASIONAAL:
# Business Day:
Berig die regering het die vlaag van voedselvergiftiging in die land as ‘n nasionale ramp verklaar. Die koerant skryf dit is die belangrikste stap tot nou om die openbare gesondheidskrisis aan te pak nadat president Cyril Ramaphosa beveel het dat spazawinkels wat verbind word met kindersterftes onmiddellik gesluit word.
# En Mail & Guardian op Vrydae:
Skryf daar is reuseprobleme in Suid-Afrika se mynbedryf wat regstreeks aanleiding gee tot onwettige mynbedrywighede. Volgens die koerant is die ingryping van die polisie in Stilfontein tot nadeel van die omgewing se ekonomie.
GAUTENG:
# Beeld:
Berig die diamantsmous Louis Liebenberg se vrou, Dezzi, het hard teen die trane geveg toe haar borgtogaansoek van die hand gewys is. Die 50-jarige Dezzi se borgtogaansoek in die Landdroshof in Bronkhorstspruit het volgens die koerant misluk omdat sy nie kon bewys dat dit in die belang van geregtigheid sal wees nie.
Dan skryf die koerant ‘n klagte van diefstal en bedrog word intussen na bewering teen Dezzi se lyfwag, Clarina Vorster ondersoek. Sy het na bewering met die Liebenberg-egpaar se borgtoggeld verdwyn.
En laastens is daar nuus oor Bayer se Yaz Plus-voorbehoedpille. Van die pakkies het glo suikerpille bevat en wag daar ‘n paar verrassings.
# The Star & Pretoria News:
Skryf daar is vrae oor die verbintenis tussen werknemers van die Departement van Openbare Werke en die eiendomsmaatskappy SKG Africa.
En tweedens word berig daar sal geen uitstel verleen word vir die opgradering van elektrisiteitsmeters nie.
# Sowetan:
Berig nog ‘n kind, die vyfjarige Syabonga Mnisi is in Soweto dood aan voedselvergiftiging en die vergiftiging is besig om in ‘n ramp te ontaard.
# En The Citizen:
Skryf volgens navorsing word sowat 52-persent van huishoudelike welvaart tans deur swart gesinne besit in vergeleke met die 32-persent deur wit gesinne.
VRYSTAAT:
# Volksblad in Bloemfontein:
Lei ook met Liebenbergs in die Bronkhorstspruit-landdroshof.
En tweedens is daar nuus oor ‘n video van ‘n onderwyser van Bronkhorstspruit, Kay van Greunen wat haar leerders se name onthou deur net hulle stemme te hoor.
WES-KAAP:
# Die Burger:
Berig die Openbare Beskermer gaan die voorkoms van voedselverwante sterftes en siektes ondersoek. Advokaat Kholeka Gcaleka sê die prosesse van ‘n paar staatsdepartemente sal ondersoek word.
En tweedens skryf die koerant ook oor die Liebenbergs en die voorbehoedpille.
# En Cape Times:
Skryf besmette voedselitems wat weggegooi is, word opgelaai en herverkoop.
En berig kenners is van mening die daling in die terugkoopkoers is nie groot genoeg om ‘n uitwerking op die ekonomie te hê nie.
OOS-KAAP:
# The Herald in Gqeberha:
Berig die Menseregtekommissie het die afgedankte DA-LP Renaldo Gouws bestempel as sonder berou en arrogant en dat hy hom verslustig het in die omstredenheid rondom sy haatspraakskandaal.
En tweedens skryf die koerant die verhoorverrigtinge van ‘n Pretoriase vrou wat van afpersing aangekla word, is in die Gespesialiseerde Handelsmisdaadhof in Gqeberha vertraag nadat die hof versuim het om ‘n Venda-tolk te verskaf.
KWAZULU-NATAL:
# Daily News in Durban:
Skryf die spazawinkeleienaars in eThekwini het opgeruk en betoog oor die proses van registrasie wat nou gevolg word.
En ten slotte uit NAMIBIË:
# Republikein in Windhoek:
Berig hoewel die meeste huishoudings reeds hul elektrisiteitsmeters opgradeer het, is daar duisende wat na verwagting sonder elektrisiteit sal wees wanneer die sperdatum Sondag aanbreek.
Dan skryf die koerant vier lede van die Rehoboth Blok A-buurtwag is op borgtog vrygelaat nadat hulle gevang is met agt koedoekarkasse in hul besit wat glo op ’n hervestigingsplaas gejag is. En laastens is daar nuus oor die ou Engelse kerkie in Grootfontein. Pas nadat dit restoureer is, is dit nou opnuut in die mark.