Goeie Nuus

BULLETIN NUUSAGENTSKAP 21 November

Goeiemiddag. Hier is jou Goeie Nuus:

# Twee studente van die Nelson Mandela-universiteit het uitgeblink op die Internasionale Konferensie oor Gevorderde Nano-materiaal en Nanotegnologie in Rome, Italië. Die konferensie het vooraanstaande navorsers van oral in die wêreld byeengebring om baanbrekervordering in die veld van nanowetenskap ten toon te stel. Zenande Pali het die Beste Plakkaatvoorleggingstoekenning gewen terwyl Itumeleng Zosela as moderator opgetree het in die bemiddeling van gesprekke. Die universiteit sê die studente se prestasies benadruk die uitnemendheid en globale uitwerking van die instelling se navorsing in nano-geneeskunde.

# Die Universiteit van Pretoria sê sy Javett-kunssentrum het ʼn grensverskuiwende stap na inklusiwiteit gedoen met sy jongste uitstalling, We, The Purple. Dit bied ʼn unieke geleentheid vir siggestremde besoekers om kuns en geskiedenis deur hul tassintuig te beleef. Die universiteit sê die kunswerke bied ʼn unieke, nie-visuele manier om die maatskaplik-politieke geskiedenis van Suid-Afrika van die 1950’s tot die 1980’s te ervaar. Blind SA se uitvoerende hoof, Jace Nair, sê sulke veldtogte help om grense af te breek en inklusiwiteit in die kunste te bevorder.

# Opwinding is aan die opbou vir die Kaapstadse Speelgoedlopie-liefdadigheidsgeleentheid wat nou al die meeste kere ooit in die wêreld aangebied word. Die geleentheid word Sondag op die Killarney-renbaan gehou. Dit bring die motorfietsgemeenskap en die publiek bymekaar vir die ondersteuning en skenking van speelgoed, geskenke en fondse aan kinders in plekke van veiligheid, in hospitale of kinderhuise. Dit sluit ‘n motorfiets- en motortentoonstelling, asook ‘n biertuin en ‘n verskeidenheid kosstalletjies. Die eintlike tog begin by GrandWest en die Athlone-stadion, en eindig by Killarney.

# Lady Gaga, Travis Scott, Green Day en Post Malone sal in April die hooftrekpleisters wees op die 2025 Coachella-fees by die Empire Polo Grounds in Indio, Kalifornië. Gaga was in 2017 ook een van die fees se hoofkunstenaars terwyl dit Scott, Malone en Green Day se eerste keer is. Die Suid-Afrikaner, Tyla, sal ook optree nadat sy verlede jaar weens ‘n besering nie kon deelneem nie. Ander kunstenaars wat by die fees optree, sluit Missy Elliot, Megan Thee Stallion, Charli XCX, Anitta, Benson Boone en Shaboozey in.

# En ten slotte: Die kunstenaar, Maurizio Cattelan se skepping met die titel Comedian, is by ʼn veiling in New York vir meer as elf-miljard-rand verkoop. Dit bestaan uit een piesang wat teen ʼn muur vasgeplak is en foto’s daarvan het soos ʼn veldbrand versprei. Die Chinese versamelaar en stigter van ʼn kriptogeldeenheid-platform, Justin Sun, het die werk gekoop. Sun sal ʼn rol kleefband en een piesang ontvang, asook ʼn egtheidsertifikaat en amptelike aanwysings om dit uit te stel. David Galperin van Sotheby’s beskryf Comedian as ʼn rebelse en geniale werk:

Bly ingeskakel vir meer nuus……………….