Nuus 08:00

BULLETIN 11 November 8 vm

Goeiemôre. Ek is……..

In die bulletin:

# Die DA sê die onttrekking van die SAUK-wetsontwerp is dapper en beslissend
# Die Parlement se laagsbetaalde werkers sal meer verdien as onderwysers en polisiebeamptes
# En rugby: Die Springbok Vroue Sewes het hul Afrika-kampioenskapstitel herower

# Die DA beskryf die minister van Kommunikasie en Digitale Tegnologie, Solly Malatsi, se onttrekking van die omstrede SAUK-wetsontwerp in die Parlement as dapper en deurslaggewend. Die minister voer aan die wetsontwerp hanteer nie die SAUK se dringende finansiële behoeftes nie en gee die minister te veel mag wat die aanstelling van raadslede betref. Thsolofelo Bodlani van die DA sê gegewe die openbare uitsaaier se magdom uitdagings, is die wetsontwerp beslis teenproduktief:

# Die Parlement gaan oor die volgende drie jaar die salarisse van sy laagsbetaalde werkers, onder wie skoonmakers, kokke en kelners, verdubbel. Volgens die Sunday Times sal die werkers se jaarlikse verdienste styg van 170-duisend-rand na 340-duisend-rand, wat meer is as die tipiese salarisse van die land se intree-onderwysers en -polisiebeamptes. Die woordvoerder van die Parlement, Moloto Mothapo, sê die nuwe salarisaanpassing skakel effektief die onregverdige tweeledige stelsel uit en verseker dat alle intreewerkers, wat ook al hulle werkskategorie is, onder ‘n eenvormige betaalstruktuur val.

# Die minister van Elektrisiteit en Energie Kgosientsho Ramokgopa skakel vandag met die burgemeester van die Stad Johannesburg Dada Morero en bestuurders van City Power. Hulle gaan praat oor die metro se uitstaande munisipale skuld aan Eskom en die implikasies daarvan vir kragvoorsiening. Die kragnutsmaatskappy het verlede week inwoners gewaarsku oor sy voorneme om die kragtoevoer aan die metro te onderbreek, weens sy 4,9-miljard-rand historiese skuld en 1,4-miljard-rand se huidige rekeningskuld. Die minister se kantoor sê skuld het ‘n aansienlike uitwerking op Eskom se finansiële volhoubaarheid.

# Oekraïne het die grootste hommeltuigaanval op Rusland uitgevoer sedert Vladimir Putin se volskaalse inval in 2022. Moskou se Verdediging-ministerie sê hulle het die naweek 84 Oekraïnse hommeltuie oor ses streke onderskep. Dit het veroorsaak dat vlugte van drie van die land se grootste lughawens herlei moes word. Die Oekraïnse weermag sê dit was in reaksie op 145 hommeltuie wat Rusland na elke deel van die land gestuur het. Die lugaanvalle het plaasgevind terwyl Rusland blykbaar 50-duisend soldate opgeroep het om gebiede in Koersk wat deur Oekraïne beset word, te herower.

# Rugby: Die Springbok-vrouesewes het hulle titel in die Afrika-vrouekampioenskap suksesvol verdedig nadat hulle Kenia in die eindstryd in Ghana met 19-10 verslaan het. Met dié vasteland-sege kwalifiseer Suid-Afrika vir volgende jaar se Wêreldrugby-uitdaagreeks. Afrigter Renfred Dazel het sy spelers se poging wat onder moeilike omstandighede by die Universiteit van Ghana se rugbystadion plaasgevind het, geloof. Hy sê hulle het die grondslag vir die res van die seisoen gelê:

# En, die finansiële aanwysers: Die rand verhandel teen 17-rand-62-sent teen die dollar, 18-rand-89-sent teen die euro en 22-rand-76-sent teen die pond. Bitcoin verhandel teen 81-duisend-172-dollar-81-sent. Die prys van goud is twee-duisend-670-dollar-1-sent per fynons en die prys van Brent ruolie is 73-dollar-71-sent per vat.

Bly ingeskakel vir meer nuus……………….