Nuus 07:00
BULLETIN 11 November 7 vm
Goeiemôre. Ek is……..
In die bulletin:
# Minister Malatsi regverdig sy besluit om die SAUK-wetsontwerp aan die Parlement te onttrek
# Watervermindering gaan ingestel word in Johannesburg se hoë-verbruikgebiede
# En Netanyahu sê hy het belangrike gesprekke met Trump gevoer
# Die minister van Kommunikasie en Digitale Tegnologie, Solly Malatsi, sê die SAUK-wetsontwerp in sy huidige formaat dien nie die langtermynbelange van die uitsaaier en landsburgers nie. Die SAUK verwag in 2024/2025 ‘n finansiële verlies van 590-miljoen-rand, in vergeleke met 1,1-miljard-rand in 2023/2024. Malatsi het die wetsontwerp in die Parlement onttrek en sê die huidige formaat hanteer nie ʼn geloofbare befondsingsmodel om die uitsaaier se volhoubaarheid te verseker nie:
Die parlementêre portefeuljekomitee oor Kommunikasie en Digitale Tegnologie het intussen kommer uitgespreek oor Malatsi se onttrekking van die SAUK-wetsontwerp. Die komiteevoorsitter, Khusela Diko, sê die SAUK se probleme vereis ʼn weldeurdagte en dringende reaksie, en nie ondeurdagte optrede wat prosesse wat reeds aan die gang is, belemmer en ontwrig nie. Sy sê die openbare uitsaaier kan nie toegelaat word om te misluk nie, omdat dit rampspoedig sal wees.
# Die Wes-Kaapse regering het ingryping by die Theewaterskloof-munisipaliteit goedgekeur. Dit volg ná uitgebreide assessering van die munisipaliteit se finansiële posisie, wat probleme uitwys met sy vermoë om dienste te lewer. Die LUR vir Finansies, Deidré Baartman, sê in die 2022/2023-boekjaar het die munisipaliteit deurlopend meer as 95-persent van sy inkomste ingevorder en die jaar met ʼn surplus afgesluit. Sy sê die invorderingskoers het teen Augustus vanjaar afgeneem tot 64-persent, wat ver onder die Nasionale Tesourie se aanbevole standaard is:
# Johannesburg Water het ‘n nuwe waterverminderingstrategie aangekondig vir hoë-verbruikgebiede, wat vandag in werking tree. Dit gebeur te midde van Vlak 1-waterbeperkings wat in September ingeskop het. Die algemene bestuurder van operasies by Johannesburg Water, Mzakhe Mtshweni, sê die verminderings sal oornag van nege-uur tot vyf-uur die oggend ingestel word omdat ‘n reserwe van net 40-persent beskikbaar is. Mtshweni bevestig ‘n skedule wat die vermindering uiteensit, sal beskikbaar gestel word om te verseker inwoners is ingelig.
# Israel se eerste minister, Benjamin Netanyahu, sê hy het sedert die verkiesing drie keer met Amerika se aangewese president Donald Trump gepraat om die bondgenootskap tussen hulle nasies te versterk. Israelse aanvalle op Libanon en die noorde van Gaza het Sondag tot 23 mense, insluitend kinders, se dood gelei. Netanyahu beskryf die gesprekke met Trump as goed en belangrik en sê albei stem saam oor Iran se bedreiging op alle vlakke, en die gevaar wat dit inhou.
# Krieket: Die Proteas het in die tweede T20 in Gqeberha ʼn drie-paaltjie-oorwinning oor Indië behaal en die reeks van vier wedstryde staan nou op een elk. Die besoekers het eerste gekolf en 124 vir ses aangeteken met Hardik Pandya wat ʼn onoorwonne 39 behaal het. In antwoord daarop het Tristan Stubbs se vennootskap van 42 lopies saam met Gerald Coetzee Suid-Afrika gered van 66 vir ses en daarmee Indië se wenpad van elf agtereenvolgende seges beëindig. Die derde T20 vind Woensdag in Johannesburg plaas.
# En die finansiële aanwysers: Die rand verhandel teen 17-rand-61-sent teen die dollar, 18-rand-89-sent teen die euro en 22-rand-76-sent teen die pond. Bitcoin verhandel teen 81-duisend-287-dollar-54-sent. Die prys van goud is twee-duisend-672-dollar-70-sent per fynons en die prys van Brent ruolie 73-dollar-57-sent per vat.
Bly ingeskakel vir meer nuus……………….