Nuus 06:00

BULLETIN 11 November 6 vm

Goeiemôre. Ek is……..

In die bulletin:

# Floyd Shivambu beloof om die MK-party gedug te maak
# Die Nasionale Tesourie waarsku oor die uitwerking van inkomstebelasting op die Basiese Inkomstetoelaag
# En rugby: Die Springbokke teken hul negende agtereenvolgende sege oor Skotland aan

# Die voormalige adjunkpresident van die EFF, Floyd Shivambu het belowe om die MK-party te help om ‘n gedugte organisasie te word wat verkiesings sonder moeite kan wen. Die president van MK, Jacob Zuma het hom as sekretaris-generaal aangestel om die leisels oor te neem by Sifiso Maseko, wat verlede week bedank het. Hy is terug by die Gautengse Departement van Gesondheid. Shivambu het aan die SABC gesê hy sal die party met respek en eerlikheid dien:

# Die Nasionale Tesourie waarsku teen die instelling van ‘n basiese inkomstetoelae, en wys op die ernstige uitwerking daarvan op belasting. Die Tesourie sê die Covid-19 Maatskaplike Noodverligtingsinkomstetoelae kos belastingbetalers jaarliks 40-miljard-rand, wat teen 2032 kan styg tot 171-miljard-rand, sou dit permanent gemaak word. Edgar Sishi van die Tesourie benadruk dat ‘n universele toelae jaarliks tot 400-miljard-rand kan bedra, wat moontlik groot verhogings in belasting kan meebring.

# Die Posbank het begunstigdes van maatskaplike toelaes verseker hulle Sassa gouekaarte sal geldig bly tot hulle die nuwe Posbank swartkaarte ontvang het. Dit volg na verwarring oor die kaart se verstrykingsdatum op 31 Desember. Volgens Sassa het ‘n landwye verspreiding van die swartkaarte in KwaZulu-Natal, Gauteng, die Noord-Kaap en Noordwes begin. Die Posbank sê begunstigdes kan steeds die gouekaarte in die oorgang gebruik want dit verbeter sekerheid en voldoening. Die tuisaflewering van nuwe kaarte van mense wat bedlêend is, sal binnekort bekend gestel word.

# Die Gautengse premier, Panyaza Lesufi, sê ‘n provinsiale strategie is ontwikkel om die toepassing van die verordeninge en regulasies te versterk wat spaza-winkels en ander voedselverkopers beheer. Die provinsie het 441 gevalle van voedseloordraagbare siektes met 23 sterftes aangeteken. Die premier het met raadslede, munisipale leiers en departementshoofde vergader om provinsiale reaksie te koördineer. Lesufi sê veiligheidstandaarde moet regoor die provinsie afgedwing word:

# Die minister van Bosbou, Visserye en die Omgewing, Dion George, lei hierdie week ‘n Suid-Afrikaanse afvaardiging na die Verenigde Nasies se Klimaatveranderingskonferensie, COP29, in Baku, Azerbaidjan. Daar word verwag COP29 sal pogings verskerp om hulpbronne vir ontwikkelende lande te bepaal om ambisieuse klimaatteikens te bereik onder vanjaar se tema van In Solidariteit vir ‘n Groen Wêreld. George sê die konferensie vind plaas op ‘n kritieke oomblik van verskerpte geopolitieke spanning, verhoogde handelsbeskerming en verdelende benaderings oor kwessies soos koolstofgrensaanpassings.

# Rugby: Die Springbokke het Skotland op Murrayfield met 32-15 verslaan in hul negende agtereenvolgende sege oor die gasheer. Makazole Mapimpi het twee drieë in die eerste helfte gedruk, met Thomas du Toit wat ‘n derde bygevoeg het en Jasper Wiese ‘n laat vierde. Skotland is beperk tot die 15 punte van Finn Russell se skopskoen. Dié oorwinning plaas die Bokke weer boaan die wêreldranglys. Kaptein Eben Etzebeth sê die wedstryd was taai:

# En die finansiële aanwysers: Die rand verhandel teen 17-rand-62-sent  teen die dollar, 18-rand-88-sent teen die euro en 22-rand-76-sent teen die pond. Bitcoin verhandel teen 80-duisend-524-dollar-71-sent. Die prys van goud is twee-duisend-683-dollar-24-sent per fynons en die prys van Brent ruolie 73-dollar-88-sent per vat.

Bly ingeskakel vir meer nuus……………….