Nuus 16:00

BULLETIN NUUSAGENTSKAP 4 September 4 nm

Goeiemiddag. Ek is……..

In die bulletin:

# SAOG-ministers hou ‘n vergadering oor die reaksie op A-pokke
# Oekraïne se minister van Buitelandse Sake bedank voor ‘n verwagte kabinetskommeling
# En, rugby: Siya Kolisi oefen weer en is dalk betyds fiks vir Saterdag se botsing met die All Blacks

# Ministers van Gesondheid van die Suider-Afrikaanse Ontwikkelingsgemeenskap hou ‘n virtuele vergadering om die epidemiologiese vooruitsigte van A-pokke te beoordeel en ‘n streeksreaksie te koördineer. Die ministers sal die situasie met A-pokke in Afrika, openbare gesondheid en oorgrenssiekte-toesighouding bespreek. Hulle sal ook voorkeur gee aan multi-sektorale ingrypings om die verspreiding te beheer. Die vergadering volg op voorskrifte van die 44ste SAOG-spitsberaad nadat die Wêreldgesondheids-organisasie en die Afrika-sentrums vir Siektebeheer en -voorkoming A-pokke tot openbare gesondheidsnoodtoestand verklaar het.

# Die MK-party verwelkom en waardeer die lening van 17,86-miljard-rand deur die BRICS-bank aan die Suid-Afrikaanse regering om water- en sanitasie-infrastruktuur te ontwikkel. Floyd Shivhambu van die MK-party sê hulle waardeer ook die lening van vyf-miljard-rand aan Transnet. Shivhambu sê hulle weet sulke lenings kom sonder die neo-liberale en neo-koloniale voorwaardes wat gewoonlik met lenings van die Wêreldbank en die Internasionale Monetêre Fonds gepaardgaan:

# Die DA waarsku die Padongelukkefonds is op die punt om ineen te stort met betalings wat glo al vir bykans vier maande stil staan. Die party versoek die minister van Vervoer, Barbara Creecy, om dringend in te gryp, en wys op ‘n gebrek aan toesig asook bestuurskwessies. Woordvoerder Chris Hunsinger sê sonder daadwerklike optrede sal die regte van slagoffers van padongelukke ernstig in die gedrang kom:

# Oekraïne se minister van Buitelandse Sake, Dmytro Kuleba, het bedank voor ‘n verwagte groot kabinetskommeling. Dit volg op ‘n nuwe vlaag Russiese missiel-aanvalle wat oornag minstens sewe mense gedood het. Kuleba was as Oekraïne se top-diplomaat ‘n vooraanstaande figuur in president Volodymir Zelensky se administrasie, wat spesifiek met oorsese amptenare geskakel het. Volgens berigte uit die land se Parlement, word groot kabinetsveranderings dié week verwag, met die bedankings van die ministers vir Strategiese Nywerhede, Justisie, die Omgewing en Herintegrasie.

# Rugby: Die Springbokkaptein, Siya Kolisi, gaan dalk fiks wees om Saterdag die All Blacks in Kaapstad te pak nadat hy vandag weer begin oefen het. Hy het ‘n gesigbesering opgedoen in die naweek se Rugbykampioenskapswedstryd op Ellispark, maar die swelsel het glo aansienlik gesak en daar is ‘n kans dat hy ingesluit sal word wanneer afrigter Rassie Erasmus môre sy groep vir die wedstryd aankondig. Die vleuel Kurt-Lee Arendse moes die oefening op die pawiljoen dophou na harsingskudding en sal nie kan speel nie.

# En die finansiële aanwysers: Die rand verhandel teen 17-rand-90-sent teen die dollar, 19-rand-78-sent teen die euro en 23-rand-48-sent teen die pond. Bitcoin verhandel teen 56-duisend-533-dollar-83-sent. Die prys van goud is twee-duisend-488-dollar-8-sent per fynons en die prys van Brent-ruolie 73-dollar-82-sent per vat.

Bly ingeskakel vir meer nuus……………….