Nuus 12:00

BULLETIN NUUSAGENTSKAP 6 Augustus 12 nm

Goeiemiddag. Ek is……..

In die bulletin:

# Fedsas veroordeel LUR Chiloane se ondersoek na die Pretoria High School for Girls-saak
# Kaapstadse belanghebbers verenig teen die boubedryf-mafia in ontwikkelingsprojekte
# En, Paralimpiese Spele: Nog agt name is by Span SA gevoeg

# Die Federasie van Suid-Afrikaanse Skoolbeheerrade veroordeel die Gautengse LUR vir Onderwys, Matome Chiloane, se besluit om ‘n onafhanklike ondersoek in te stel na bewerings van rassisme by die Pretoria High School for Girls. Die leerders is vrygespreek op alle aanklagte, maar die skoolhoof, Phillipa Erasmus, is vir 90-dae geskors, hangende ‘n ondersoek. Fedsas se uitvoerende hoof, Jaco Deacon, dreig met regsoptrede teen die LUR, terwyl die Nasionale Vereniging van Skoolbeheerrade die onafhanklike ondersoek steun.

# Die Stad Kaapstad, Atterbury, Ou Mutual-eiendomme en ander belanghebbers het onderneem om ontslae te raak van die boubedryf-mafia in ontwikkelingsprojekte. Atterbury se uitvoerende hoof, Louis van der Watt, wys daarop hoe moeilik dit is om misdadige elemente uit te ken, en sê samewerking tussen die nasionale en plaaslike regerings is nodig om hulle aan die man te bring. Burgemeester Geordin Hill-Lewis het ‘n bygewerkte swartlys beloof en om sekerheid op te skerp. Die veldtog is gemik op veiligheid en etiese ontwikkelingsomgewings deur samewerking, verbeterde keuring en deursigtigheid.

# Die minister van Beplanning, Monitering en Evaluering, Maropene Ramokgopa, doen ‘n beroep op alle belanghebbbendes om saam te werk vir die verskerping van openbare bewustheidsveldtogte oor die gevare van spooroorgange. Die minister het die Tsantsabane-munisipaliteit in die Noord-Kaap besoek waar ‘n ongeluk Sondag plaasgevind het waarby ‘n Transnet-trein en ‘n vragmotor by ‘n spooroorgang naby Groenwater betrokke was. Drie volwassenes en ‘n kind het gesterf. Ramakgopa sê ‘n multi-sektorale benadering is nodig om spooroorgang-ongelukke te verminder:

# ‘n Ondersoek van die Verenigde Nasies het bevind nege werknemers van sy hoofagentskap vir Palestynse humanitêre hulpverligting, UNWRA, was moontlik betrokke by die Hamas-geleide aanval op Israel op sewe Oktober verlede jaar. Sowat een-duisend-200 mense is dood en meer as 200 gyselaars is na Gaza geneem. Die VN se adjunk-woordvoerder, Farhan Haq, het nie presiese besonderhede verskaf oor die betrokkenheid van die nege nie, maar sê almal is afgedank:

# Paralimpiese Spele: Die Suid-Afrikaanse Sportkonfederasie en Olimpiese Komitee het nog agt name by Span SA gevoeg vir die Spele wat die 28ste in Parys begin. Dit sluit die dubbele Grand Slam-rolstoeltenniskampioen Kgothatso Montjane en die para-driekampatleet Kirsty Weir in. Goue-medaljewenners sal 400-duisend-rand ontvang, silwermedaljewenners 200-duisend-rand en bronswenners 75-duisend-rand. Suid-Afrika het op die vorige Paralimpiese Spele in Tokio sewe medaljes opgeraap: vier goues, een silwer en twee brons.

# En die finansiële aanwysers: Die rand verhandel teen 18-rand-53-sent teen die dollar, 20-rand-25-sent teen die euro en 23-rand-60-sent teen die pond. Bitcoin verhandel teen 55-duisend-825-dollar-23-sent. Die prys van goud is twee-duisend-414-dollar-15-sent per fynons en die prys van Brent-ruolie 76-dollar-29-sent per vat.

Bly ingeskakel vir meer nuus……………….