Eko-minuut

BULLETIN 26 Maart 1:30 nm

Goeiemiddag, hier is jou Eko-minuut:

# Die Green Connection en Natural Justice het met regstappe begin teen die goedkeuring wat aan TotalEnergies EP South Africa verleen is vir verkenningsboorwerk in afdeling 5, 6 en 7 aan die Kaapse kus. Hulle voer aan die besluit het nie die maatskaplik-ekonomiese uitwerking evalueer nie, ignoreer die gevolge van klimaatsverandering en verwaarloos die behoorlike evaluering van oliestortings-gebeurlikheidsplanne. Green Connection se strategiese leier, Liziwe McDaid, beklemtoon die behoefte aan nakoming van omgewingswette en die beskerming van kushulpbronne vir toekomstige geslagte, om volhoubare bestuur van oseane te verseker.

# Die Suid-Afrikaanse Weerdiens het ‘n geel vlak 2-waarskuwing uitgereik vir swaar donderstorms vandag wat tot plaaslike oorstromings kan lei in die sentrale dele van die Noord-Kaap en noordoostelike dele van die Wes-Kaap. In die Noord-Kaap word gedeeltelik bewolkte, winderige en warm tot baie warm weer verwag terwyl verspreide reën en donderbuie ook kan voorkom. Die weervoorspeller, Stacy Colborne, sê in die Wes-Kaap kan enkele buie en donderbuie oor die oostelike dele voorkom, maar verspreide buie kan in die verre oostelike gebiede verwag word:

# En, laastens: Die Universiteit van Kaapstad se Onderwaterklub werk saam met die Twee Oseane-akwarium in Kaapstad om fondse in te samel vir skilpadbewaring en 50 tieners te borg om vir ʼn mariene-wetenskapkursus in te skryf. Die jaarlikse fondsinsameling wat Diver24 genoem word en op die sesde van volgende maand plaasvind, verwag meer as 85 duikers wat aan die I&J-oseaan-uitstalling gaan deelneem in ʼn aflos-duik van 24 uur. Die organiseerders hoop om 45-duisend-rand in te samel en die geld sal aan die Twee Oseane-akwariumstigting geskenk word.

Bly ingeskakel vir meer nuus……………….