Sportnuus 12:30

BULLETIN SPORTNUUS 30 September 12:30 nm

Goeiemiddag, ons kyk na die jongste sportnuus en uitslae:

# Eerstens sokkernuus: Bafana Bafana se afrigter, Pitso Mosimane, sê hulle sal Eritreë nie ligtelik opneem in vanaand se tweede Afrikabeker-kwalifiseerder in Kaïro, Egipte, nie. Suid-Afrika het sy veldtog die afgelope naweek afgeskop deur Guineë 2-1 te klop, terwyl Eritreë met 1-elk gelykop gespeel het teen Kenia in die ander groep D-wedstryd. Mosimane het die Eritrese doelskieter Ali Suleiman, wat in Egipte gebaseer is, geïdentifiseer as die speler om dop te hou. Hy sê hy is vinnig en dodelik op vaste fasette, en kan vanuit enige hoek doele aanteken.

# Krieket: Die Proteas se draaibouler, Keshav Maharaj, glo die huidige reeks teen Australië is ‘n gulde geleentheid om die grondslag te lê vir volgende jaar se Wêreldbekertoernooi. Suid-Afrika sal vanmiddag in die derde en laaste eendagwedstryd in Potchefstroom probeer om skoonskip te maak voor die drie toetse. Maharaj, wat tot dusver ses paaltjies in die reeks geneem het, sê hulle fokus op die proses terwyl hulle voortgaan om die span se diepte te versterk en op sekere fasette te verbeter in die aanloop tot die wêreldtoernooi.

# Rugby: Die Haaie se verdedigingsafrigter, Joey Mongalo, sê Saterdag se Verenigde Rugbykampioenskaps-kragmeting met die verdedigende kampioen, Leinster, in Durban is ‘n uitstekende geleentheid om hulself teen die bestes te toets. Die span het sy veldtog afgeskop deur Ospreys 41-24 te klop, terwyl die Ierse span teen die Leeus verloor het. Mongalo sê hulle kon vier swak oomblikke in die wedstryd teen Ospreys identifiseer eerder as ‘n algemene verdedigingsprobleem, wat hulle nie teen Leinster kan bekostig nie. Hy erken die Haaie se agterlyn gaan ‘n moeilike tyd beleef.

Ander rugbynuus: Die voormalige Engelse kaptein, Lawrence Dallaglio, gaan sy wennersmedalje van 2003 se Wêreldbekertoernooi opveil weens voortdurende finansiële probleme. Die 54-jarige is verlede jaar bankrot verklaar en het ’n versameling aandenkings uit sy loopbaan te koop aangebied. Dallaglio het gespeel toe Engeland Australië in 2003 20-17 verslaan het in die eindstryd in Sydney. Daar word verwag die medalje sal tussen 1,1- en 1,7-miljoen-rand oplewer. Die veiling, wat ook sy medalje as naaswenner van 2007 se Wêreldbekertoernooi en ander toekennings insluit, sal na verwagting sowat 3,9-miljoen-rand inbring.

# En tennis: Aryna Sabalenka van Belarus sê sy is uitgerus voor haar eerste toernooi sedert sy vroeër die maand die eerste plek op die wêreldranglys aan Elena Rybakina van Kazakstan moes afstaan. Dit was ná die Amerikaanse Ope, waar sy ook in die eindstryd teen Rybakina verloor het. Sabalenka was vir 99 weke nommer-een op die ranglys, maar die viermalige Grand Slam-kampioen sal die seisoen die eerste keer sedert 2022 sonder ‘n groot titel afsluit. Albei spelers neem van vandag deel aan die Chinese Ope in Beijing.

Bly ingeskakel vir meer nuus……………….