Nuus 13:00

BULLETIN 25 September 1 nm

Goeiemiddag. Ek is……..

In die bulletin:

# KwaZulu-Natal se polisiekommissaris gee opdrag vir die Moord- en Roofeenheid om die massamoord in KwaMakhutha te ondersoek
# Die DA versoek minister Dina Pule om Parlement in te lig oor die sluipmoordkomplot binne SASSA
# En sokker: Bafana Bafana se afrigter is versigtig vir Guinee se bedreiging in hulle AFCON-kwalifiseerder

# Die polisiekommissaris van KwaZulu-Natal, Nhlahla Mkhwanazi, het die polisie se Moord- en Roofeenheid opdrag gegee om ondersoek in te stel na die moord op elf mense wat Dinsdagaand in die Ziko-gebied in KwaMakhutha, Durban, doodgeskiet is. Veertien mense was in ‘n huis toe drie aanvallers met vuurwapens losgebrand het. Polisiewoordvoerder Robert Netshiunda sê tien slagoffers is op die toneel dood, terwyl nog een in die hospitaal beswyk het:

# Die DA het die minister van Maatskaplike Ontwikkeling, Dina Pule, versoek om die Parlement in te lig oor ‘n beweerde sluipmoordkomplot teen die Oos-Kaapse streekbestuurder van die maatskaplike sekerheidsagentskap SASSA. Bandile Maqetuka is glo geteiken toe hy bedrog en korrupsie van sowat tien-miljoen-rand ontbloot het. Die DA sê die aantygings laat ernstige vrae ontstaan oor die omvang van bedrog en korrupsie binne SASSA en of die netwerk voordeel uit die toelaagstelsel trek. Daar is ook kommer oor die veilighed van amptenare wat die oortredings blootlê.

# Activists and Citizens Forum vra die Onafhanklike Direktoraat teen Korrupsie om duidelikheid te verskaf of die voormalige parlementslid, Vincent Smith, onregverdig uitgesonder is in die Bosasa-korrupsiesaak. Hy is in Maart tot sewe jaar tronkstraf gevonnis op aanklagte van bedrog en korrupsie wat verband hou met gunslone wat hy van die geriefs-bestuursmaatskappy ontvang het. Dennis Bloem van die forum sê ander mense wat deur die staatkapingskommissie betrek is, moet nog aanspreeklik gehou word:

Nuus uit die buiteland:

# Die Britse minister van Buitelandse Sake, Ed Miliband, waarsku Iran sy land sal nie intimidasie, dreigemente of vyandige bedrywighede toelaat deur groepe wat bande met Teheran het nie. Hy het gister met sy Iranse ampsgenoot, Abbas Araghchi, gepraat tydens die Verenigde Nasies se Algemene Vergadering in New York. Britse intelligensiedienste het ‘n week gelede ontdek dat ŉ Iranse spioenasie-programmatuur-veldtog sensitiewe inligting van teikens reg oor die wêreld steel. Miliband waarsku Iran om afskaling en diplomasie te kies bo ŉ uitgerekte oorlog met Amerika en Israel.

# Sokker: Bafana Bafana se afrigter, Pitso Mosimane, is vol vertroue dat hulle môre vir Guinee kan klop in hulle eerste Afrikabeker-kwalifiseerder op die Orlando-stadion in Soweto. Die Wes-Afrikaland sal waarskynlik Suid-Afrika se sterkste teenstander wees in Groep D, wat ook Kenia en Eritreë insluit. Mosimane sê hy is deeglik bewus van die bedreiging van Guinee, wat spog met een van die wêreld se gevaarlikste doelskoppers, Serhou Guirassy:

# En die finansiële aanwysers: Die rand verhandel teen 16-rand-31-sent teen die dollar, 18-rand-58-sent teen die euro en 21-rand-59-sent teen die pond. Bitcoin verhandel teen 84-duisend-618-dollar. Die prys van goud is vier-duisend-295-dollar-76-sent per fynons en die prys van Brent ruolie is 103-dollar-13-sent per vat.

Bly ingeskakel vir meer nuus……………….