Sportnuus 12:30

BULLETIN SPORTNUUS 7 September 12:30 nm

Goeiemiddag, ons kyk na die jongste sportnuus en uitslae:

# Ons begin met krieket: Die Proteas het ‘n oortuigende oorwinning oor Zimbabwe behaal om die driehoekige T20-reeks in Windhoek, Namibië, te wen. Jordan Hermann het sy eerste T20-vyftigtal behaal en Suid-Afrika met 53 van 29 balle gehelp om 205 vir vyf op die telbord te plaas. Björn Fortuin en Duan Jansen het daarna elkeen drie paaltjies platgetrek en Zimbabwe help uitboul vir 157. Die Proteas fokus nou op die reeks van drie eendagwedstryde teen Namibië, wat Woensdag begin.

# Rugby: Die verdedigende kampioen, Griekwas, speel Saterdag gasheer vir die Pumas in die Curriebeker-eindstryd in Kimberley in die Noord-Kaap. Griekwas het sewe drieë gedruk in die eerste halfeindstryd teen die Leeus in Kimberley en 52-12 gewen. Dis gevolg deur ʼn titaniese stryd in Bloemfontein, waar die Pumas ʼn naelskraapse sege van 27-24 oor die Cheetahs behaal het. Die eindstryd is ʼn herhaling van 2022 s’n toe die Pumas 26-19 gewen en die beker die eerste en enigste keer in hulle geskiedenis omhoog gehou het.

# Gholf: Die verdedigende kampioen, Thriston Lawrence, het die Europese Meesterstoernooi in Switserland gewen en by die Spaanse meester Seve Ballesteros aangesluit as die enigste spelers om die toernooi drie keer te wen. Die Suid-Afrikaner het Paul Casey op die vierde uitspeel-putjie getroef. Nog ‘n Engelsman, Harry Hall, het in die laaste ronde sewe onder baansyfer aangeteken om derde te eindig, een hou agter Lawrence en Casey. Lawrence, wat nou ses oorwinnings op die DP World-toer behaal het, het prysgeld van net meer as tien-miljoen-rand gewen.

# Motorsport: Die Formule Een-kampioenskapsvoorloper, Kimi Antonelli, het sy tuiswedren, die Italiaanse Grand Prix, gewen nadat hy in die 19de plek weggespring het. Die 20-jarige is die eerste Italianer sedert 1966 om op Monza te wen. Sy Mercedes-spanmaat, George Russell, was tweede en Max Verstappen van Red Bull derde. Antonelli is nou 66 punte voor Russell in die bestuurders-kampioenskap. Hy sê hy fokus nou op een wedren op ‘n slag:

# En tennis: Die verdedigende kampioen, Carlos Alcaraz, pak die plaaslike speler Ben Shelton in die kwarteindronde van die Amerikaanse Ope. Die Spanjaard het die 20ste-gekeurde Amerikaner Tommy Paul, verslaan, terwyl Shelton die Griek Stefanos Tsitsipas uitgeskakel het. Nog ‘n Amerikaner, Frances Tiafoe, het 2021 se kampioen, Daniil Medvedev van Rusland, geklop. Die tweemalige vroue-kampioen, Aryna Sabalenka van Belarus, is die sesde agtereenvolgende jaar deur na die kwarteindronde nadat sy die Amerikaner Taylor Townsend geklop het. Sy speel teen die Wimbledon-kampioen, die Tsjeg Linda Noskova, wat Marta Kostyuk van Oekraïne uitgeskakel het.

Bly ingeskakel vir meer nuus……………….