Nuus 15:00

BULLETIN 2 September 3 nm

Goeiemiddag. Ek is……..

In die bulletin:

# ‘n Reeksmoordenaar en oud-polisieman is gevonnis tot vier lewenslange vonnisse elk vir ‘n dubbele moord
# Hoëkommissaris Sooklal word vrygespreek rakende Zuma se besoek aan die Guptas in Indië
# En sokker: Premierliga-klubs oortref die oordrag-bestedingsrekord die tweede agtereenvolgende jaar

# Die Hooggeregshof in Pretoria het die reeksmoordenaar Rassie Nkuna en die afgedankte polisiebeampte Jacob Chego elk vier lewenslange vonnisse opgelê vir die moord op die swanger Sabeiliwe Mogashoa en haar man, Lucky, in Pretoria in Maart 2022. Hulle het tereggestaan op 12 aanklagte, insluitend moord, ontvoering en bedrog. Die egpaar is voor hul kinders vermoor om hul motor te steel. Polisiewoordvoerder Athlenda Mathe prys sersant Nkosingphile Mathenjwa en die Gautengse opsporingspan:

# Die VF Plus in Gauteng sê die Ekurhuleni-metro se versuim om aanspreeklikheid vir onreëlmatige besteding af te dwing is onaanvaarbaar. Aanbevelings is tydens Maandag se raadsvergadering ter tafel gelê om meer as 140-miljoen-rand se geskiedkundige onreëlmatige besteding af te skryf. Drie-en-vyftig-miljoen-rand kan nie verhaal word nie weens verlore dokumente en onbeskikbare personeel. Karl Rautenbach van die VF Plus sê om geld af te skryf moet nooit gevolgsbestuur vervang nie:

# Die Departement van Internasionale Betrekkinge en Samewerking het Suid-Afrika se hoëkommissaris in Indië, Anil Sooklal, van enige skuld onthef nadat oudpresident Jacob Zuma die Guptas in Junie in die Asiese land besoek het. Die ondersoek is ingestel na berigte dat Sooklal gehelp het om die ontmoeting tussen Zuma en die Gupta-broers te reël. Die departement sê Sooklal het binne die perke van sy mandaat opgetree en protokol gevolg. Hy sê sy ondersoek het geen bewyse gevind dat hy die besoek bemiddel het of vooraf bewus was daarvan nie.

# Sokker: Engelse Premierliga-klubs het die bestedingsrekord vir oordragte die tweede agtereenvolgende jaar oortref, en 75,5-miljard-rand bestee. Elf van die 20 klubs het hul oordragrekords oortref. Enzo Fernandez se gesamentlike Britse oordragrekord-skuif van Chelsea na Manchester City het opslae gemaak nadat hy vir 2,7-miljard-rand verkoop is. Die Argentyn is die vierde speler wat in hierdie oordrag-tydperk vir meer as twee-miljard-rand verkoop word. Die ander is Morgan Rogers van Aston Villa na Chelsea, Bradley Barcola van Paris Saint-Germain na Liverpool, en Elliot Anderson van Nottingham Forest na Manchester City. 

# Die finansiële aanwysers: Die rand verhandel teen 16-rand-10-sent teen die dollar, 18-rand-64-sent teen die euro en 21-rand-72-sent teen die pond. Bitcoin verhandel teen 76-duisend-355-dollar. Die prys van goud is vier-duisend-317-dollar-61-sent per fynons en die prys van Brent-ruolie is 96-dollar-54-sent per vat.

# En ten slotte: China se Nasionale Energie-administrasie sê die land se geïnstalleerde sonkrag-vermoë het teen die einde van Julie 1,286-miljard kilowatt bereik. Geïnstalleerde sonkrag-vermoë het die eerste keer steenkool-krag verbygesteek om die grootste kragbron in China te word. China het in die eerste sewe maande van vanjaar meer as 86 gigawatt sonkrag bygevoeg, wat die algehele sonkragvermoë met sowat 16-persent laat styg teenoor die vorige jaar. China het nou meer geïnstalleerde sonkrag as die res van die wêreld saam.

Bly ingeskakel vir meer nuus……………….