Nuus 16:00

BULLETIN 28 Augustus 4 nm

Goeiemiddag. Ek is……..

In die bulletin:

# Thabo Bester se verhoordatum word vasgestel vir April volgende jaar
# Rugby: Pollard gaan die tweede toets teen die All Blacks misloop en Kolbe is terug
# En koning Harald die Vyfde van Noorweë sterf op 89

# Die ontsnappingsverhoor van die veroordeelde verkragter en moordenaar Thabo Bester, Nandipha Magudumana en hul medebeskuldigdes vind van 19 April tot 18 Junie volgende jaar in die Vrystaatse Hooggeregshof plaas. Hulle staan tereg op aanklagte van hulp met ‘n ontsnapping, brandstigting en die skending van ‘n liggaam. Bester se regsverteenwoordiger, MoAfrica Wa Maila, het tydens vandag se kort voorverhoor gesê hy is bekommerd oor die aanlyn hofverskyning en beweerde teistering deur korrektiewe beamptes. Hy sê hul sukkel om toegang tot Bester te kry. Die staat is gereed vir die verhoor.

# Die waarnemende minister van Polisie, Firoz Cachalia, sê aanvalle op polisielede is aanvalle op die oppergesag van die reg en die gesag van die demokratiese staat. Dit volg ná die onlangse moorde op polisielede in Reigerpark, Gauteng, en Knysna in die Wes-Kaap. Cachalia het tydens ‘n nuuskonferensie oor die misdaadstatistiek vir April tot Junie gesê die verlies van polisielede raak die hele land. Hy het sy meegevoel met die gesinne betuig:

# Die taxibaas Joe “Ferrari” Sibanyoni beweer sekere lede van wetstoepassings-agentskappe tree op as tussengangers vir mense in die taxibedryf. Hy het voor die Madlanga-kommissie getuig hierdie reëlings is bekend binne sommige taxi-verenigings, maar hy kon nie spesifieke amptenare of verenigings identifiseer nie. Sibanyoni sê dis privaat ooreenkomste tussen mense en moeilik om te bewys, daarom kon hy nie verdere besonderhede verskaf nie:

# Rugby: Die Springbokke het bevestig die ervare losskakel Handré Pollard gaan môre se tweede toets teen die All Blacks in Kaapstad misloop weens ‘n kuitbesering. Sacha Feinberg-Mngomezulu vervang hom in die nommer tien-trui en Manie Libbok bied dekking op die bank. Afrigter Rassie Erasmus het ook aangekondig die drieë-vraat Cheslin Kolbe is in die opdrafspan ingesluit nadat hy aanvanklik uitgelaat is weens ‘n voetbesering. Hy vervang vir Kurt-Lee Arendse, en sal waarskynlik met die stelskopwerk toevertrou word.

# Die finansiële aanwysers: Die rand verhandel teen 15-rand-99-sent teen die dollar, 18-rand-62-sent teen die euro en 21-rand-72-sent teen die pond. Bitcoin verhandel teen 79-duisend-504-dollar. Die prys van goud is vier-duisend-594-dollar-64-sent per fynons en die prys van Brent-ruolie is 90-dollar-24-sent per vat.

# En ten slotte: Noorweë se koning, Harald die Vyfde, het in die ouderdom van 89 gesterf in die Oslo Universiteitshospitaal, waar hy behandeling ontvang het vir ‘n bakteriële besmetting en ‘n bloedafwyking. Sy seun, kroonprins Haakon, volg hom op en is nou koning Haakon die Agtste. Harald was 35 jaar lank koning, die langsdienende monarg in Noorweë se moderne geskiedenis. Die koninklike paleis sê hy het vreedsaam gesterf. Die nuwe koning sal sy amptelike naam en leuse tydens ‘n buitengewone vergadering van die Staatsraad bevestig.

Bly ingeskakel vir meer nuus……………….