Nuus 13:00

BULLETIN 28 Julie 1 nm

Goeiemiddag. Ek is……..

In die bulletin:

# Suid-Afrika en Nigerië kom ooreen om migrasie- en streeksveiligheid-samewerking te versterk
# Motorsport: Lando Norris glo steeds hy kan weer vanjaar die F1-kroon dra
# En nuut-vrygestelde klankopnames onthul Biden het erken hy was in besit van geklassifiseerde dokumente

# Suid-Afrika en Nigerië het ooreengekom om samewerking ten opsigte van migrasie, misdaad en streeksveiligheid te versterk. Die minister van Internasionale Betrekkinge en Samewerking, Ronald Lamola, het met die Nigeriese president, Bola Tinubu, vergader tydens ‘n diplomatieke sending na Abuja namens president Cyril Ramaphosa. Sy woordvoerder, Chrispin Phiri, sê kommer is uitgespreek oor die betrokkenheid van sekere buitelanders, insluitend Nigeriese burgers, by georganiseerde misdaad, onwettige dwelmhandel en finansiële bedrog:

# Die Suider-Afrikaanse Ontwikkelingsgemeenskap is daartoe verbind om oorgrens-transaksies goedkoper en vinniger te maak. Die Angolese kwanza het die tweede betalingseenheid geword om by die elektroniese streeksbetaalstelsel aan te sluit. Hy het 13 jaar lank uitsluitlik die rand gebruik, hoofsaaklik om Suid-Afrika se gevorderde finansiële infrastruktuur te benut. Botswana en Mosambiek sal volgende aansluit. Die president van die Suid-Afrikaanse Reserwebank, Lesetja Kganyago, sê dis ‘n belangrike mylpaal vir plaaslike finansiële integrasie:

# Die Oos-Kaapse Vervoerdepartement het ‘n senior beampte voorlopig geskors na ŉ ondersoek na ŉ vermeende onregmatige aanstelling. Die betrokke persoon is Phelisile Melane, wat aangestel is as adjunkdirekteur: Werknemerverhoudings. ŉ Onafhanklike feitesending het die werwingsproses, kwalifikasies tydens die aanstelling en voorleggings van betrokkenes ondersoek. Die departement se woordvoerder, Unathi Binqose, sê Melane sal voor ŉ tugverhoor verskyn:

# Motorsport: Die verdedigende Formule Een-kampioen, Lando Norris van McLaren, glo dis nie te laat om die titel te probeer behou nie nadat hy Sondag in Hongarye sy eerste Grand Prix van die seisoen gewen het. Die Brit is tans vyfde in die bestuurderskampioenskap, 91 punte agter die voorloper, die Italianer Kimi Antonelli van Mercedes. Norris sê Max Verstappen van Red Bull was verlede seisoen 104 punte agter hom met tien wedrenne oor en het uiteindelik met net twee punte verloor. Hy sê die druk is beslis op Antonelli.

# Die finansiële aanwysers: Die rand verhandel teen 16-rand-76-sent teen die dollar, 19-rand-5-sent teen die euro en 22-rand-28-sent teen die pond. Bitcoin verhandel teen 63-duisend-387-dollar. Die prys van goud is vier-duisend-en-42-dollar-65-sent per fynons en die prys van Brent-ruolie is 88-dollar-42-sent per vat.

# En ten slotte: Die regsgesinde Oversight Project het klankopnames vrygestel waarin die Amerikaanse oudpresident, Joe Biden, erken hy was in besit van geklassifiseerde dokumente ná sy vertrek as visepresident. Sommige van die opnames bevat gesprekke tussen hom en sy spookskrywer, Mark Lewis Zwonitzer, wat hom gehelp het met sy memoir, Promise me, Dad, van 2017. Daar is oomblikke waar Biden skynbaar sukkel met datums en inligting. Daar is ook gesprekke waarin hy beleidsverskille met oudpresident Barack Obama bespreek, sowel as sy besluit om hom in 2016 as presidentskandidaat verkiesbaar te stel.

Bly ingeskakel vir meer nuus……………….