Nuus 14:00

BULLETIN 18 Junie 2 nm

Goeiemiddag. Ek is……..

In die bulletin:

# Die DA vra dringende parlementêre optrede teen Ramaphosa se hofaansoek te midde van die sperdatum
# Die OVK vra kiesers om hul registrasiebesonderhede by te werk tydens die registrasienaweek
# En sokker: Dis vanaand ‘n reg-of-weg-wedstryd vir Bafana teen die Tsjeggiese Republiek

# Die DA sê die Parlement se ampsklagkomitee het nie die regsgesag om president Cyril Ramaphosa se hofaansoek om die skrapping van die ampsklagproses te betwis nie. Die Parlement se Grondwetlike en Regsdienstekantoor beveel aan die aansoek moet teengestaan word. Die DA-parlementslid Glynnis Breytenbach sê die speaker van die Nasionale Vergadering moet hofstukke teen die interdik-aansoek indien voor môre se sperdatum. Sy beklemtoon enige vertragings kan die Parlement se grondwetlike verantwoordelikhede ondermyn:

# Die uitvoerende hoof van die Verkiesingskommissie, Sy Mamabolo, het alle stemgeregtigde kiesers gevra om hul registrasiebesonderhede by te werk tydens die spesiale kieserregistrasienaweek. Hy sê presiese kiesersinligting sal verseker burgers word in die regte stemdistrik geplaas. Meer as 23-duisend-700 registrasiestasies sal Saterdag en Sondag vanaf sesuur soggens tot vyfuur namiddag landwyd oop wees. Mamabolo het bevestig alles is getoets en gereed om ‘n gladde en toeganklike registrasieproses te ondersteun:

# Die vakbondfederasie Cosatu verwelkom die Nywerheidsontwikkelingskorporasie en die Vision Group se reddingspakket om die suikerreus Tongaat Hulett te red. Dit het tot gevolg dat sowat 250-duisend werksgeleenthede in die suiker-waardeketting behoue bly. Matthew Parks van Cosatu sê die moontlike likwidasie van die maatskappy en hoeksteen van die ekonomieë in KwaZulu-Natal en Mpumalanga sou ‘n slag wees vir die land wat hy nie sou kon bekostig nie:

# Sokker: Vanaand se Groep A-Wêreldbeker-wedstryd tussen Suid-Afrika en die Tsjeggiese Republiek is ‘n beslissende ontmoeting nadat albei spanne hul eerste wedstryde verloor het. Bafana Bafana het 2-0 teen Mexiko vasgeval in die openingswedstryd, terwyl die Tsjegge 2-1 teen Suid-Korea verloor het. Suid-Afrika hoop om die eerste keer ooit verder as die groepfase te vorder, maar sal vanaand sonder Yaya Sithole en Themba Zwane wees nadat hulle albei ‘n rooikaart gekry het teen Mexiko. Die afskop is sesuur vanaand, Suid-Afrikaanse tyd.

# Die finansiële aanwysers: Die rand verhandel teen 16-rand-42-sent teen die dollar, 18-rand-83-sent teen die euro en 21-rand-73-sent teen die pond. Bitcoin verhandel teen 63-duisend-914-dollar. Die prys van goud is vier-duisend-268-dollar-21-sent per fynons en die prys van Brent-ruolie is 77-dollar-88-sent per vat.

# En ten slotte: Die Verenigde Nasies sê soldate en regeringsmagte is verantwoordelik vir meer ernstige oortredings teen kinders in gewapende gevegte verlede jaar as gewapende groepe buite die staat. Die VN se jaarverslag oor Kinders en Gewapende Konflik het 38-duisend-558 ernstige gevalle aangeteken, insluitend moorde en verkragtings, wat meer as 24-duisend kinders geraak het. Lande met die hoogste vlakke van vergrype sluit in Palestina, Israel, Nigerië en Mianmar. Die VN sê wanneer state, op wie die verpligting rus om kinders te beskerm eerder tot hul lyding bydra, dui dit op ‘n verdere agteruitgang in die respek vir internasionale reg.

Bly ingeskakel vir meer nuus……………….