Follow Us
News Headlines 06:30
Wed 9th Feb 2022
Action Society eis dat Oos-Kaapse pa maksimum tronkstraf kry [KLANK]
Wed 9th Feb 2022
Print Friendly, PDF & Email

NUUSFLITS NUUSAGENTSKAP 9 Februarie 7 vm

Goeiemôre,

In die bulletin:

# Die Algemene Balieraad ontvang versoeke om Dali Mpofu van die Regterlike Dienskommissie te verwyder
# Eskom gaan sy bes doen om beurtkrag tydens die staatsrede te voorkom
# En, Vodacom gaan appelleer teen die “Please Call Me”-beslissing

# Die Algemene Balieraad sê hy het talle versoeke ontvang dat advokaat Dali Mpofu uit die Regterlike Dienskommissie verwyder word. Dit volg na sy optrede tydens onderhoude met kandidate vir die pos as hoofregter. Die raad se voorsitter, Craig Watt-Pringle, sê Mpofu het die advokaat-beroep en regsadministrasie in oneer gebring. Hy sê die seksistiese aard van Mpofu se ondervraging van die appèlhof-president, Mandisa Maya, wat aan die begin daarvan in totaal onaanvaarbare seksuele toespeling ontaard het, was aanstootlik en onprofessioneel.

# Eskom sê hy gaan alles in sy vermoë doen om beurtkrag te vermy tydens die staatsrede. President Cyril Ramaphosa sal na verwagting sy staatsrede Donderdag in die Kaapstadse stadsaal lewer. Die kragverskaffer moes Maandagaand noodgedwonge fase 2-beurtkrag instel nadat talle opwekkingseenhede onklaar geraak het. Eskom se uitvoerende hoof, Jan Oberholzer, sê hulle fokus daarop om beurtkrag in die toekoms so ver as moontlik te vermy en nie net Donderdag nie. Hy sê die kragvoorsiener streef daarna om sy aanlegte met behulp van ervare en gekwalifiseerde personeel in stand te hou.

Intussen sê Eskom se groepshoof van opwekking, Phillip Dukashe, daar is ernstige probleme by die Majuba-kragstasie in Mpumalanga, en gevolge-bestuur word toegepas. Van die eenhede by Majuba moes afgeskakel word omdat die kragvoorsiener nie genoeg steenkool gehad het nie.  Hy sê die kragsentrale was nie voorbereid op die weersomstandighede nie en die steenkool het nat gereën. Die probleme by Majuba het gelei tot ‘n verlies van nagenoeg twee-duisend megawatt krag by dié kragsentrale alleen.

# Vodacom sê hy gaan appelleer teen die Hooggeregshof in Pretoria se beslissing oor vergoeding aan Nkosana Makate wat die “Please Call Me”-funksie geskep het. Regter Wendy Hughes het bevind Makate is geregtig op vyf-persent van die totale inkomste wat die produk tussen Maart 2001 en Maart 2021 verdien het. Makate het vroeër Vodacom se aanbod van 47-miljoen van die hand gewys nadat die Konstitusionele Hof in 2019 beveel het die selfoon-maatskappy moet te goeder trou oor gepaste vergoeding vir die uitvinding onderhandel. Vodacom hou vol sy onderhandelinge met Makate was te goeder trou.

# Die Verenigde Nasies se afdeling vir menseregte het kommer uitgespreek oor herhaalde voorvalle van dodelike etnies-gemotiveerde aanvalle op mense in kampe vir ontheemdes in die Demokratiese Republiek van die Kongo. Minstens 62 vlugtelinge wat lede is van die Hema-gemeenskap, is op die eerste van die maand doodgeskiet en 38 ander is beseer toe ‘n gewapende groep van die Koöperatief vir die Ontwikkeling van die Kongo ‘n vlugtelingkamp aangeval het. ‘n Woordvoerder van die VN se hoë kommissaris vir menseregte, Liz Throssell, sê hulle doen ‘n beroep op owerhede om dringend die beskerming van alle burgers te verskerp.

# Rugby: Die Bulle se slot, Ruan Nortje, sê hulle sal alles moet uithaal wanneer hulle Saterdag teen die Haaie uitdraf in die Verenigde Rugbykampioenskap-kragmeting op Loftus Versfeld. Die Bulle het nog momentum nadat hulle die Leeus verlede naweek met 21-13 geklop het. Nortje sê hulle is egter  bewus van die uitdaging wat voorlê wanneer hulle die Haai-span vol Springbokspelers pak. Hy sê die span sal veral moet sokkies optrek in die skrums.

# En die finansiële aanwysers: Die rand verhandel teen 15-rand-35-sent teen die dollar, 17-rand-55-sent teen die euro en 20-rand-81-sent teen die pond. Bitcoin verhandel teen 43-duisend-282-dollar-9-sent. Die prys van goud is een duisend-827-dollar-96-sent per fynons en die prys van Brent ruolie 91-dollar-2-sent per vat.

Vir die jongste nuusgebeure, bly ingeskakel op ……………….

Our team is here to answer your questions. Editorial questions? Chat to the Editor on duty Free Trial or general questions? Chat to Debbie Technical issues? Chat to our Tekkie
WeCreativez WhatsApp Support
Free Trial / General Enquiries
Debbie Oosthuizen: GM
Away
WeCreativez WhatsApp Support
Editor on duty
Peet Bothma
Away
WeCreativez WhatsApp Support
Editor on duty
Andries Cornelissen
Away
WeCreativez WhatsApp Support
Editor on duty
Lusanda Bill
Away
WeCreativez WhatsApp Support
Technical Support
Tekkie
Away
WeCreativez WhatsApp Support
Editor on duty
Mariana Vos
Away