Follow Us
Nuus-hooftrekke 06:30
Mon 14th Feb 2022
Tensions between Russia and Ukraine could affect SA’s agriculture sector
Mon 14th Feb 2022
Print Friendly, PDF & Email

NUUSFLITS NUUSAGENTSKAP 14 Februarie 7 vm

Goeiemôre,

In die bulletin:

# President Cyril Ramaphosa sê hy het geen inligting oor die misbruik van staatsgeld vir partydoeleindes nie
# Die DA sê die Padongelukkefonds probeer aanspreeklikheid vermy
# En, Joe Biden herhaal Amerika se ondersteuning vir die Oekraïne

# President Cyril Ramaphosa sê hy het geen regstreekse en spesifieke besonderhede oor die beweerde misbruik van staatsgeld vir die party se politieke doeleindes nie. TimesLive berig hy het ‘n brief onder oë gehad wat die president aan die voorsitter van die parlementêre staande komitee oor openbare rekeninge, Mkhuleko Hlengwa, geskryf het oor die uitgelekte stemopname. In die brief sê Ramaphosa na bewering die opmerkings oor staatsfondse wat hy by die NUK-vergadering gemaak het, was gebaseer op bewerings wat reeds in die openbaar bekend was. Hy sê sedert hy president geword het, het hy ‘n aantal stappe gedoen om die misbruik van openbare fondse te beëindig.

# Die DA sê die Padongelukkefonds is ‘n sinkende skip. Die fonds het ‘n dringende aansoek in die Noord-Gautengse Hooggeregshof in Pretoria ingedien om die Ouditeur-generaal te keer om sy verslag vry te stel en in die Parlement ter tafel te lê. Die oudit het bevind die fonds se laste is meer as 361-miljard-rand. Chris Hunsinger van die DA sê die fonds se finansiële probleme is eindeloos en dit kom voor of hy aanspreeklikheid probeer ontduik. Hy sê die voorlegging van jaarlikse finansiële state is ‘n statutêre verpligting en die DA sal alles moontlik doen om toe te sien die verslag word vrygestel.

# ‘n Onderwysaktivis doen ‘n beroep op die Departement van Basiese Onderwys om berading te bied aan leerders sonder dokumente wat deur Operasie Dudula getraumatiseer is. Hendrick Makanete sê die kinders van onwettige immigrante is in die kruisvuur tussen Operasie Dudula en ongedokumenteerde buitelanders. Makaneta voeg by kinders se regte om te leer in ‘n omgewing wat daarvoor bevorderlik is, moet ten alle koste beskerm word. Hy sê dis duidelik die immigrantekinders is emosioneel deur die operasie geraak en hulle moet berading en ondersteuning ontvang om te verseker hulle maak ‘n sukses van hul skoolloopbane.

# Die afgelope 24-uur is 16-duisend-186 Covid-19-inentings in Suid-Afrika toegedien en een-duisend-649 nuwe gevalle is aangemeld. Hiervan is 35-persent in Gauteng,  gevolg deur die Wes-Kaap met 22-persent en KwaZulu-Natal met 14-persent. Veertien mense is in dié tydperk in die hospitaal opgeneem. Nog twee Covid-19-verwante sterftes is aangemeld wat die opgeloopte dodetal op 96-duisend-993 te staan bring. Die land se herstelkoers is steeds sowat 96-persent.

# President Joe Biden sê hy het dit duidelik aan die Oekraïnse president Volodymyr Zelensky gestel dat Amerika vinnig en beslissend sal optree teen enige verdere aggressie van Rusland. Die Withuis sê die twee leiers het gister meer as ‘n uur oor die foon gepraat. Rusland ontken enige planne om die Oekraïne binne te val ten spyte van sowat 100-duisend soldate wat op die Oekraïnse grens saamgetrek is. Biden en Zelensky stem saam dit is noodsaaklik om ‘n diplomatieke en afskrik-roete te volg in reaksie op Rusland se militêre bedreiging.

# Rugby: Die Franse klub, Toulon, het bevestig die Springbok-slot Eben Etzebeth gaan weens persoonlike redes vroeg van sy kontrak vrygestel word. Hy sal aan die einde van die huidige seisoen na Suid-Afrika terugkeer. Etzebeth sê hy sal tot dan alles doen om die span toe te laat om te presteer, om op die punteleer te vorder en hulle bes te doen om die Uitdaagbeker op te raap. Volgens berigte gaan die 30-jarige speler by die Haaie aansluit.

# En die finansiële aanwysers: Die rand verhandel teen 15-rand-23-sent teen die dollar, 17-rand-29-sent teen die euro en 20-rand-65-sent teen die pond. Bitcoin verhandel teen 41-duisend-760-dollar-60-sent. Die prys van goud is een duisend-854-dollar-54-sent per fynons en die prys van Brent ruolie 95-dollar-88-sent per vat.

Vir die jongste nuusgebeure, bly ingeskakel op ……………….

Our team is here to answer your questions. Editorial questions? Chat to the Editor on duty Free Trial or general questions? Chat to Debbie Technical issues? Chat to our Tekkie
WeCreativez WhatsApp Support
Free Trial / General Enquiries
Debbie Oosthuizen: GM
Away
WeCreativez WhatsApp Support
Editor on duty
Peet Bothma
Available
WeCreativez WhatsApp Support
Editor on duty
Andries Cornelissen
Away
WeCreativez WhatsApp Support
Editor on duty
Lusanda Bill
Available
WeCreativez WhatsApp Support
Technical Support
Tekkie
Available
WeCreativez WhatsApp Support
Editor on duty
Mariana Vos
Away